Arrestohet imami i Gjilanit, 1 muaj paraburgim për 40 “Terroristët”
Nga OraNews Përditësimi i fundit 14 Gusht 2014, 10:14
Kosovë- Autoritetet e rendit kanë njoftuar se gjatë një operacioni të sotëm në Gjilan dhe Skënderaj, kanë arrestuar dy persona, nën dyshimet për rekrutim për terrorizëm, organizim dhe pjesëmarrje në grup terrorist dhe nxitje të urrejtjes kombëtare, përçarjes ose mosdurimit kombëtar, racor, fetar apo etnik.Gjatë arrestimit thuhet të jenë sekuestruar dëshmi materiale që ndërlidhen me akuzat.Në një njoftim të Policisë së Kosovës, thuhet se njëri nga të arrestuarit, me inicialet Z.Q., është imam në xhaminë El-Kuddus në Gjilan dhe “dyshohet të jetë një ndër frymëzuesit kryesorë të xhihadit”, i cili është gjetur i fshehur në veturën e tij në një terren malor në afërsi të shtëpisë së tij.I dyshuari i dytë, me inicialet L.K., nga fshati Polac i Skënderajt, thuhet të jetë gjetur në vendbanimin e tij. Të dyve u është shqiptuar masa e ndalimit prej 48 orësh.Ndërkaq,gjykata Themelore e Kosovës ka vendosur sot masën e paraburgimit prej 30 ditëve për dyzet të arrestuarit që dyshohen se kanë marrë pjesë në luftimet në Siri dhe Irak përkrahë organizatave të shpallura terroriste si ISIS dhe Al-Nusra, nën dyshimin se kanë kryer vepra penale nga kapitulli “Veprat penale kundër rendit kushtetues dhe sigurisë së Republikës së Kosovës.
Avokati Besnik Berisha, i ka thënë KosovaPress-it se ky që është një lajmi keq për vetë imazhin e Kosovës sepse gjykata nuk ka arrit të ketë fakte se këta persona janë marr me veprime që i vihen barrë, në anën tjetër konfirmon edhe dështimin e institucioneve të sigurisë të cilat deri më tani nuk kanë arritur të pengojnë ose të parandalojnë veprimet të tilla.“Sa i përket ligjshmërisë së vendimit, një vendim i tillë është i ligjshëm por nuk përmban arsye të mjaftueshme ligjore, në veçanti nuk përmban arsye specifike, individuale dhe konkrete për secilin të pandehur veç e veç. Sigurisht që në fazat e më vonshme, ky aktvendim mund të prishet nga Gjykata e Apelit dhe çështja të kthehet në rivendosje”, ka thënë ai.Ai ka paralajmëruar se do të ofrojë ankesë brenda afatit dhe pret që ky vendim të ndryshohet në favor të klientit të tij.
