Arsimi, Shqipëria firmos me KE, "Erasmus+", shumë mundësi për studime
Nga OraNews Përditësimi i fundit 19 Qershor 2014, 18:28
Shqipëria ka nënshkruar sot, në Bruksel, me Komisionin Europian, marrëveshjen për pjesëmarrjen e vendit tonë në programin e BE-së për arsimin, Erasmus+.
Kjo marrëveshje e bën Shqipërinë pjesë të këtij programi komunitar, prej 14.7 miliardë eurosh në një periudhë 7-vjeçare.
Ministria e Arsimit tha se "marrëveshja u nënshkrua për Shqipërinë nga Zëvendësministri i Arsimit dhe Sportit, Arbjan Mazniku dhe për Komisionin Europian nga Drejtori i Përgjithshëm për Edukimin dhe Kulturën (DG EAC), Z. Jan Truszczynski.
"Erasmus+", programi më i ri arsimor i Bashkimit Evropian, i cili synon modernizimin e sistemeve arsimore dhe përshtatjen e tyre me nevojat e tregut të punës, do të mbështesë financiarisht një sërë veprimtarish në fushat e arsimit, trajnimit, rinisë dhe sportit për periudhën 2014-2020.
Programi ofron mundësi për studentë, praktikantë, personel akademik dhe administrativ, vullnetarë, që të studiojnë një periudhë të caktuar jashtë shtetit me qëllim që të rrisin aftësitë e tyre për shanse më të mira punësimi.
Oranews.tv
