Kosovë, plagosen tre policë në veri të Mitrovicës
Nga OraNews Përditësimi i fundit 1 Prill 2014, 07:30
Tre policë të Kosovës janë plagosur me armë zjarri në komunën e Zubin Potokut në veriun e Kosovës të banuar me shumicë serbe.Policia tha se në rrethana ende të paqarta është qëlluar më armë zjarri mbi një patrullë të policisë kufitare që ishte në lëvizje në fshatin Banjskë të Zubin Potokut.Tre policët, që të tre të përkatësisë kombëtare serbe kanë pësuar plagë dhe janë dërguar në spitalin e veriut të Mitrovicës ku sipas mjekëve njëri prej tyre, Oliver Kuzmanoviç, është në gjendje më të rëndë me plagë në kraharor dhe në bark.Nuk dihen në shumë hollësi rreth këtij incidenti dhe as për autorët apo motivet e mundshme të tij.Presidentja e Kosovës Atifete Jahjaga, e dënoi ashpër sulmin duke e cilësuar atë “si një përpjekje për të penguar funksionimin e rendit demokratik dhe të sundimit të ligjit në Kosovë”.Në reagimin e saj, presidentja Jahjaga thekson se “sulmi mbi policinë e Kosovës, nga persona ende të panjohur, është përpjekje për të pamundësuar zbatimin e ligjit dhe për të mbajtur në tension qytetarët e vendit. Institucionet e Kosovës nuk do të lejojnë pengimin e vendosjes së rendit në tërë territorin e vendit dhe nuk do të pranojnë rrezikimin e funksionimit demokratik të shoqërisë sonë.Policia e Kosovës është institucioni që ka ndërtuar besimin në mesin e të gjithë qytetarëve të Kosovës pa dallim dhe ajo garanton sigurinë për të gjithë”, thuhet në reagimin e presidentes e cila bën thirrje që autorët e sulmit mbi policinë të kapen dhe të sillen përpara drejtësisë.Sulmi i së hënës, ndodhi vetëm pak orë pas përfundimit të një raundi të ri bisedimesh ndërmjet Kosovës dhe Serbisë për normalizimin e marrëdhënieve ndërmjet tyre. Bisedimet e së hënës u tha se kanë afruar qëndrimet e palëve për një marrëveshje mbi sistemin e drejtësisë në veri.Marrëveshjet e arritura gjatë vitit 2013, bënë që në fund të vitit të kaluar komunat veriore më shumicë serbe të përfshihen në zgjedhjet për pushtetin lokal të organizuara nga Prishtina. Marrëveshjet synojnë vendosjen e sundimit të ligjit në atë zonë që është skenë e kundërshtimeve më të ashpra ndaj pavarësisë së Kosovës.Përfaqësuesit e së ashtuquajturës “vijë e fortë”, nuk pajtohen me përfshirjen e veriut nën kontrollin e Prishtinës.Në janar të këtij viti, Serbia nisi bisedimet për anëtarësim në Bashkimin Evropian, si shpërblim për përfshirjen e saj në procesin e normalizimit të marrëdhënieve me Kosovën, pavarësinë e së cilës vazhdon ta kundërshtojë.Në qershor, Bashkimi Evropian do të vlerësojë përmbushjen e kritereve të përcaktuara për Serbinë në kuadër të bisedimeve për anëtarësim. Bisedimet me Serbinë i mundësuan Kosovës të hapë negociatat për stabilizim asocim me Bashkimin Evropian në tetor të vitit të kaluar.
