Berisha takim me Komandantin e Marinës së Mbretërisë së Bashkuar, gjeneral major Ed Davis
Nga OraNews Përditësimi i fundit 30 Gusht 2013, 15:50
Kryeministri Berisha prit sot në një takim Komandantin e Marinës të Mbretërisë së Bashkuar, gjeneral major Ed Davis, cili ndodhet në Tiranë me rastin e stërvitjes së përbashkët midis Forcave të Armatosura të Britanisë së Madhe dhe Forcave të Armatosura Shqiptare të emertuar “Albanian Lion-13”, e cila zhvillohet në kuadër të bashkëpunimit dypalësh midis FA të Shqipërisë dhe FA të Mbretërisë së Bashkuar. Në këtë takim, gjenerali Davis shoqërohej edhe nga ambasadori britanik në Tiranë, zoti Nicholas Cannon.Kryeministri Berisha i shprehu zotit Davis kënaqësinë për bashkëpunimin midis dy vendeve dhe veçanërisht midis forcave të tyre të armatosura. “Ne jemi në një moment të perfeksionimit të ushtrisë shqiptare si një forcë profesioniste dhe synojmë modernizmin e mëtejshëm të saj”, u shpreh kryeministri. Në këtë kontekst, ai vlerësoi se stërvitjet e përbashkëta, operacionet e përbashkëta luftarake, si dhe trajnimet dhe janë një mënyrë e mirë për të arritur objektivat e FA-ve të të dy vendeve. Duke shprehur bindjen se siguria e popujve është një sfidë, jo vetëm ushtarake por edhe ekonomike, sociale dhe fushave te tjera të jetës, kryeministri Berisha vlerësoi se reformat në të gjitha sektorët janë një “perpetum mobile” e fuqisë dhe sigurisë që krijojnë FA-të.Nga ana e tij, Komandanti i Marinës të Mbretërisë së Bashkuar, Gjenerali Ed Davis shprehu vlerësimin më të lartë për partnerët shqiptarë dhe bashkëpunimin e ofruar prej tyre, si dhe kënaqësinë për zhvillimin me sukses të kësaj stërvitje të përbashkët. “Stërvitja që zhvilluam ishte plotësisht e suksesshme dhe ne jemi të gatshëm të ofrojmë ekspertizën dhe logjistikën tonë edhe në të ardhmen.” u shpreh ai.Gjithashtu, zoti Davis vlerësoi kontributin e FA-ve të Shqipërisë, jo vetëm në trajnimet por edhe ne operacionet luftarake në Afganistan, Irak, etj. Gjenerali Davis shprehu kënaqësinë për bashkëpunimin e deritanishëm dhe vlerësoi të rëndësishëm partneritetin me FA-të shqiptare edhe në të ardhmen
