"Shqipëria duhet të vendosë kritere të qarta për bashkitë dhe komunat"/ Haxhimali: S'ka ndarje të pabarabartë
Nga OraNews Përditësimi i fundit 27 Prill 2026, 21:58
Në emisionin “Drejt” ishte i ftuar Agron Haxhimali, Drejtor Ekzekutiv i Shoqatës së Bashkive të Shqipërisë, ku u diskutua mbi reformën administrativo-territoriale dhe ndikimin e saj në identitetet lokale dhe funksionimin e njësive vendore në Shqipëri.
Debati mbi reformën territoriale vijon të mbetet i hapur, duke rikthyer në vëmendje sistemin e mëparshëm të ndarjes me 309 komuna dhe ndryshimet e mëvonshme që çuan në modelin aktual të bashkive.
Në qendër të diskutimit është dilema nëse ndarja e vjetër ishte më funksionale dhe më “organike”, apo nëse ajo nuk përballonte realitetin demografik të vendit.
Në një këndvështrim, sistemi i para vitit 2015 shihet si një model që u zhvillua natyrshëm, duke krijuar identitete lokale dhe pa shkaktuar tensione sociale të dukshme.
Ndërkohë, reforma e mëvonshme që uli numrin e njësive vendore synoi rritjen e efikasitetit administrativ.
Megjithatë, problematikë kryesore mbetet ndryshimi i madh demografik.
Shpopullimi i zonave rurale ka krijuar pabarazi të theksuara mes njësive, ku disa komuna kanë mijëra banorë, ndërsa të tjera kanë mbetur me disa qindra, duke e bërë modelin e vjetër të vështirë për t’u mbajtur funksional.
Një tjetër çështje e ngritur në debat është edhe identiteti territorial.
Edhe pse ndarja me rrethe u hoq zyrtarisht në vitin 2000 dhe u zëvendësua me qarqe, në përdorimin e përditshëm qytetarët vazhdojnë të identifikohen me “rrethin” e tyre, çka sipas ekspertëve tregon se ndryshimi administrativ nuk është reflektuar plotësisht në perceptimin shoqëror.
NDIQNI EMISIONIN E PLOTË "DREJT" NË ORA NEWS:
