Delegacioni i Fratelli d’Italia në Gjadër: Qendra e emigrantëve “funksionale”, mbi 500 persona të trajtuar dhe riatdhesime në vijim
Nga OraNews Përditësimi i fundit 20 Prill 2026, 19:14
Një delegacion nga Fratelli d’Italia zhvilloi një vizitë në qendrën e pritjes për emigrantët në Gjadër, për të parë nga afër funksionimin e saj dhe për t’iu përgjigjur kritikave që janë bërë ndaj këtij projekti.
Sipas përfaqësuesve të delegacionit, modeli i ndërtuar nga Italia në Shqipëri shihet si një projekt i ri që është përshtatur me kalimin e kohës.
Ata e konsiderojnë qendrën funksionale dhe në përputhje me rregullat europiane, sidomos për përshpejtimin e procedurave të riatdhesimit për personat që nuk përfitojnë azil.
Përfaqësuesit e delegacionit e lidhin këtë projekt edhe me uljen e ndjeshme të emigracionit të paligjshëm drejt Italisë. Sipas tyre, modeli ka ndikuar në një rënie të madhe të zbarkimeve në brigjet italiane.
Gjatë vizitës, ata kundërshtuan pretendimet që e konsiderojnë qendrën si jo funksionale apo si një shpenzim të panevojshëm, duke u shprehur se projekti është në punë dhe mund të shërbejë si shembull edhe për vende të tjera europiane.
Sipas të dhënave të bëra publike, në qendrën e Gjadrit kanë kaluar mbi 500 persona me rrezikshmëri të lartë, një pjesë e të cilëve janë riatdhesuar.
Delegacioni falënderoi strukturat e sigurisë dhe stafin që punon në qendër, ndërsa bëri të ditur se struktura është gati për të nisur edhe procedurat e përshpejtuara kufitare sapo të hyjë në fuqi pakti i ri europian për migracionin dhe azilin.
