FOTO-LAJMI/ Ky është Brian Dëma, polici fierak që përdori të miturin për të shitur dr*gë
Nga OraNews Përditësimi i fundit 17 Prill 2026, 17:39
Personi në foto është efektivi i forcave “Shqiponja” në Fier, Brian Dëma, i cili është dërguar për gjykim nga Prokuroria e Fierit nën akuza të rënda që lidhen me përfshirjen në aktivitet kriminal.
Hetimet e nisura në vitin 2024 kanë provuar se ai ka rekrutuar një të mitur, fillimisht me pretendimin për të marrë informacione, por më pas e ka përdorur atë për shpërndarjen e lëndëve narkotike.
Sipas organit të akuzës, 30-vjeçari ka shfrytëzuar gjendjen e vështirë ekonomike dhe familjare të 17-vjeçarit, i cili ishte edhe përdorues droge, për ta përfshirë në aktivitet të paligjshëm.
Edhe pse gjatë kontrolleve të kryera nuk u gjetën lëndë narkotike, hetimi proaktiv arriti të dokumentojë veprimet e tij, duke treguar se ai kishte ndërmarrë hapa konkretë për të përdorur të miturin në shitjen e drogës.
Mbi Dëmën rëndojnë tre akuza: “Prodhimi dhe shitja e narkotikëve”, “Shpërdorimi i detyrës” dhe “Shtytja e të miturit në krim”. Prokuroria thekson se veprimet e tij kanë cenuar rëndë interesat e shtetit, rendin publik dhe sigurinë e të miturit, ndërsa dosja tashmë i është dërguar gjykatës për shqyrtim të mëtejshëm./ JOQ Albania
