FOTO-ALBUMI/ Ivanka Trump në Vlorë për Sazanin, poston PAMJET me këngën “Luleborë”
Nga OraNews Përditësimi i fundit 23 Janar 2026, 07:55
Ivanka Trump, vajza dhe ish-këshilltarja e ish-Presidentit amerikan Donald Trump, ka zhvilluar një vizitë dy-ditore në Shqipëri, me fokus në eksplorimin e potencialeve për zhvillim turistik në bregdetin e jugut.
E shoqëruar nga një grup prej rreth 60 arkitektësh, vizita e saj ishte në kuadër të një projekti të mundshëm për zhvillimin e Ishullit të Sazanit dhe zonës së Zvërnecit.
Gjatë qëndrimit të saj, Trump zhvilloi disa takime me Kryeministrin Edi Rama. Të mërkurën në mbrëmje, ata patën një takim informal në zonën e Ujit të Ftohtë në Vlorë, i cili u pasua nga një darkë në një restorant në Orikum.
Gjithashtu, ajo u prit nga kreu i qeverisë edhe në Kryeministri në Tiranë.
Përtej agjendës zyrtare, Ivanka Trump ndau me ndjekësit e saj në Instagram përshtypjet nga vizita.
Ajo publikoi foto dhe video që shfaqnin bukuritë natyrore të bregdetit të Vlorës dhe Zvërnecit, si dhe pamje të Ishullit të Sazanit.
Një detaj që tërhoqi vëmendjen ishte shoqërimi i pamjeve me këngën e njohur shqiptare “Luleborë”, duke i dhënë një prekje lokale postimeve të saj.
