SHBA vlerësojnë zgjedhjet: Bashkëpunim për demokraci, të vazhdohet me reformat

Nga OraNews Përditësimi i fundit 27 Qershor 2013, 19:53

Kreu i misionit amerikan pranë OSBE-së në Vjenë, Ian Kelly, përgëzoi qytetarët e Shqipërisë për pjesëmarrjen e tyre paqësore dhe aktive në zgjedhjet parlamentare të 23 qershorit dhe tha se Shtetet e Bashkuara nxisin të gjitha palët që të punojnë sëbashku për të çuar përpara zhvillimin demokratik dhe ekonomik të Shqipërisë.Puna e vështirë e ndërtimit të demokracisë nuk mbaron pasi numërohen votat dhe shpallen fituesit, tha ambasadori Kelly në një deklaratë përpara Këshillit të Përhershëm të OSBE-së në Vienë. Udhëheqësit politikë, tha ai, nuk do të gjykohen nga ajo që thonë, por nga ajo që bëjnë.“Tani që populli i Shqipërisë ka bërë të dëgjohet zëri i tij, Shtetet e Bashkuara nxisin të gjitha palët që të punojnë së bashku në mënyrë konstruktive për të çuar përpara zhvillimin demokratik dhe ekonomik të Shqipërisë. Puna e vështirë e ndërtimit të demokracisë nuk mbaron pasi numërohen votat dhe shpallen fituesit. Udhëheqësit politikë do të gjykohen jo nga ajo që thonë, por nga ajo që bëjnë” u shpreh Ambasadori.Ai tha se Shtetet e Bashkuara nxisin qeverinë e ardhshme të Shqipërisë që të vazhdojë të forcojë shtetin ligjor, të rrisë standardet e të drejtave të njeriut, të promovojë qeverisje transparente dhe të përgjegjshme, të nxisë zhvillimin ekonomik dhe të punojë drejt reformave të qëndrueshme demokratike në rrugën e anëtarësimit në Bashkimin Europian.“Pas formimit, nxisim qeverinë e re që të vazhdojë të forcojë shtetin ligjor, të rrisë standardet e të drejtave të njeriut, të promovojë qeverisje transparente dhe llogaridhënëse, të promovojë zhvillimin ekonomik dhe të punojë drejt reformash të qëndrueshme demokratike në rrugën konsensuale të anëtarësimit në Bashkimin Europian. Ky është një proces i cili, ashtu si përpara këtyre zgjedhjeve, do të kërkojë që edhe ata në opozitë të luajnë një rol konstruktiv, dhe ne kërkojmë angazhimin e tyre edhe në të ardhmen e Shqipërisë” tha më tej ai.Ambasadori Kelly tha se ky është një proces i cili, ashtu si përpara zgjedhjeve, do të kërkojë që edhe ata në opozitë të luajnë një rol konstruktiv. Ai i bëri thirrje opozitës së ardhshme që edhe ajo të angazhohet për të ardhmen e Shqipërisë.“Mbështesim misionin e vëzhgimit zgjedhor të OSBE/ODIHR si dhe vlerësimin e përbashkët nga ODIHR, Asambleja parlamentare e OSBE-së, dhe Asambleja Parlamentare e Këshillit të Europës, të cilët vlerësuan se qytetarët shqiptarë kanë shprehur lirisht vullnetin e tyre në kutinë e votimit. Nxisim autoritetet që të finalizojnë numërimin dhe të trajtojnë çdo ankimim në mënyrë transparente, të shpejtë dhe në përputhje me shtetin ligjor. Bashkohemi me Bashkimin Europian për të mirëpritur bashkëpunimin konstruktiv midis Misionit të Vëzhgimit të Zgjedhjeve të ODIHR dhe Misionit të Vëzhgimit të Zgjedhjeve të Asamblesë Parlamentare të OSBE gjatë këtyre zgjedhjeve në Shqipëri, dhe shprehim shpresën tonë që kjo qasje pozitive do të shërbejë si themel mbi të cilin të rinovohen angazhimet e shprehura në Vendimin 19/06 të Këshillit Ministerial dhe Marrëveshjen e Bashkëpunimit të vitit 1997” përfundoi Ian Kelly.