Akademia e Sigurisë, 209 kursantë për “Patrullë e Përgjithshme” kryejnë testime e manovra policore
Nga OraNews Përditësimi i fundit 16 Prill 2023, 12:49
Në ambientet e Akademisë së Sigurisë, pas përfundimit me sukses të testit teorik, 209 kursantë të Kolegjit Profesional të Formimit Policor, për “Patrullë e Përgjithshme”, kryen një sërë demonstrimesh të teknikave, veprimeve dhe aksioneve policore, gjatë situatave komplekse të simuluara.
Situatat e paraqitura synonin të testonin kapacitetet fizike të kursantëve dhe reagimin në kohë, me qëllim garantimin dhe mbrojtjen e rendit dhe sigurisë publike.
Testimet fizike konsistonin në:
Përdorimin e forcës policore;
Kontrollin dhe ndalimin e automjeteve;
Menaxhimin e trazirave civile, tubimeve, manifestimeve dhe protestave;
Realizimin e ndërhyrjeve, aksioneve dhe operacioneve të befasishme;
Ndërhyrjen e shërbimeve të Policisë, në mbështetje të grupeve të emergjencave civile dhe ndërhyrjen në zona të thepisura; Ndërhyrjen në banesa; Shpëtimin e pengjeve.
Testimet fizike i angazhuan maksimalisht, profesionalisht dhe psikologjikisht, kursantët e Kolegjit Profesional të Formimit Policor, pasi gjatë tyre ata u ndeshën me elementët realë të punës së shërbimeve të Policisë në terren, në luftë ndaj fenomeneve kriminale, luftë të cilën në të ardhmen, do ta përballojnë pikërisht ata.
Këto testime u ndoqën nga stafi drejtues i Akademisë së Sigurisë dhe nga drejtues të lartë të Policisë së Shtetit.
Rektori i Akademisë Drejtues i Lartë Ilir Mandro dhe Zëvendësdrejtori i Përgjithshëm i Policisë së Shtetit Drejtues i Lartë Sokol Bizhga, vlerësuan angazhimin e kursantëve dhe iu uruan atyre suksese të mëtejshme gjatë praktikës në terren.
