Durrës, 2 persona grabisin 15 000 lekë në një dyqan ushqimoresh, policia në ndjekje të tyre
Nga OraNews Përditësimi i fundit 6 Janar 2023, 21:19
Një vjedhje ka ndodhur mbrëmjen e sotme në lagjen nr. 15, Durrës, ku 2 persona janë futur në një dyqan ushqimoresh.
Mësohet se ata kanë marrë rreth 15 000 lekë të rinj (xhiro ditore) dhe më pas janë larguar me një automjet, ndërsa policia po përpiqet t’i kapë ata.
“Rreth orës 19:30, në lagjen nr. 15, Durrës, dy shtetas ende të paidentifikuar, janë futur në një dyqan me produkte ushqimore në pronësi të shtetases M. T., ku kanë marrë rreth 15 000 lekë të rinj (xhiro ditore) dhe më pas janë larguar me një automjet.
Shërbimet e Policisë, menjëherë pas marrjes së njoftimit, kanë shkuar në vendngjarje, së bashku me grupin hetimor. Nga veprimet e para hetimore, është identifikuar automjeti me të cilin këta shtetas janë larguar. Vijon puna për identifikimin, lokalizimin dhe kapjen e autorëve.” – njofton policia.
Grupi hetimor, nën drejtimin e Prokurorisë, po punon për zbardhjen dhe dokumentimin e plotë të kësaj ngjarjeje.
