Blushi: Qytetarja i vdiq në zyrë, kryebashkiakja e Lushnjes shkoi në festë me të rinjtë e FRESSH-it
Nga OraNews Përditësimi i fundit 29 Dhjetor 2022, 20:03
Sekretari i Përgjithshëm i Partisë së Lirisë, Tedi Blushi ka reaguar në lidhje me ngjarjen e sotme në Lushnje, ku një qytetare ka humbur jetën në zyrat e bashkisë, ku shkoi të ankohej për shkak se i kishin ndërprerë KEMP-in.
Në një reagim në faqen e tij zyrtare në rrjetin social "Facebook", Blushi tha se vetëm pak orë pasi qytetarja ka ndërruar jetë, kryebashkiakja Eriselda Sefa shkoi të festonte Vitin e Ri me të rinjtë e FRESSH-it.
"Kryebashkiakja e Lushnjes festoi pas vdekjes së qytetares në zyrë!
Pak orë pasi qytetarja Sh. C ndërroi jetë në zyrën e saj duke i kërkuar ndihmën e mohuar ekonomike, kryetarja e bashkisë së Lushnjes Eriselda Sefa shkoi të festonte Vitin e Ri me Taulant Ballën dhe të rinjtë e FRESSH-it.
Kjo është fytyra e pashpirt e “rilindasve”: Festojnë edhe në mort me lekët që i vjedhin popullit çdo ditë dhe zero reflektim për hallet e një zonje që humbi jetën në zyrat e shtetit për shkak të keqqeverisjes, mjerimit, mosdëgjimit dhe braktisjes së qytetarëve!
Fotot e publikuara nga Taulant Balla pak orë pas tragjedisë në zyrën e Bashkisë së Lushnjes", thekson në reagimin e tij Sekretari i Përgjithshëm i PL-së, Tedi Blushi.
