PD-ja Vau i Dejës denoncon: Abuzime me ndihmën ekonomike, po përdoren për fushatën e 14 majit

Nga Ora News Përditësimi i fundit 1 Dhjetor 2022, 09:59

Partia Demokratike e Vaut të Dejës ka denoncuar Administratën e Bashkisë për abuzimin sipas saj të punonjësve që kanë hequr nga ndihma ekonomike familje në nevojë, e ka përfshirë familje të tjera pa përmbushur asnjë kriter.

Sipas kryetarit të saj Benard Ndreca, këto fonde po përdoren për fushatën e zgjedhjeve të 14 majit, pasi ka me dhjetëra raste të personave të futur në ndihmë ekonomike e që në fakt janë emigrantë apo nuk jetojnë fare në këtë bashki.

"Janë me dhjetëra, denoncime që vijnë çdo ditë pranë degës së Partisë Demokratike në Vau Dejës, të cilat vërtetojnë këtë sjellje flagrante të Administratorëve të Ndihmës Ekonomike të cilët po heqin nga lista familje me minimumin jetik.

Më dhjetëra  familje janë hequr vetëm gjatë muajve të fundit, ndërkohë që ajo që e bën me të rëndë këtë abuzim është zëvendësimi me dhjetëra të tjera pa plotësuar as dhe një kriter të vetëm.

Varfëria nuk ka ngjyrë e as parti, por kjo nuk merret për bazë nga administrata e sotme e Bashkisë Vau Dejës.

Në shkelje flagrante të ligjit, dhe pa asnjë kriter këto familje nuk do të marrin as atë lëmoshë që I jep shteti dhe përballë varfërisë së tejskajshme përballen edhe më këtë diskriminim që i bëhet atyre.

Përfitues selektiv, të cilët sa vijnë e shtohen kur çdo ditë e më tepër i afrohemi fushatës elektorale, para të cilat do të përdoren për të blere votat e familjeve në varfëri të tejskajshme, po aq me keq kur në këto lista ka me dhjetëra raste të përfituesve që as nuk jetojnë në territorin e Bashkisë Vau Dejës, por janë emigrantë në shtete të ndryshme të Europës.

Ftojmë organet e Drejtësisë, Kontrollin e Lartë të Shtetit të nisë sa më parë hetimet për të zbardhur këtë vjedhje të hapur dhe abuzim me fondet e ndihmës ekonomike të cilat që sot kanë nisur të përdoren për fushatën elektorale të zgjedhjeve të 14 Majit.

Partia Demokratike Dega Vau Dejës do të denoncojë me forcë çdo abuzim që behet në kurriz të banorëve të bashkisë Vau Dejës, ndërkohë që ftojmë administratën të heq dorë nga këto skema mashtrimi dhe abuzimi në dëm të familjeve në vështirësi ekonomike," tha kryetari i PD, Dega Vau Dejës Benard Ndreca.