Lavrov: Lufta midis fuqive bërthamore duhet të shmanget, Perëndimi po shtyn Ukrainën kundër Rusisë
Nga OraNews Përditësimi i fundit 30 Nëntor 2022, 18:12
Ministri i Jashtëm rus Sergei Lavrov tha sot se është jetike të shmanget çdo lloj konfrontimi ushtarak midis fuqive bërthamore, edhe përdorimin e armëve konvencionale, raportoi agjencia e lajmeve TASS.
Lavrov tha gjithashtu se Perëndimi po e shtynte Ukrainën të vazhdojë luftën kundër Rusisë.
"Ne duhet të shmangim çdo konflikt ushtarak midis fuqive bërthamore, madje edhe me përdorimin e armëve konvencionale. Përshkallëzimi mund të bëhet i pakontrollueshëm," tha ai, sipas TASS.
Presidenti rus Vladimir Putin ka bërë një sërë kërcënimesh “të fshehta” bërthamore gjatë luftës në Ukrainë, por disa zyrtarë të lartë kanë mohuar vazhdimisht se Moska planifikon të përdorë armë bërthamore në Ukrainë dhe kanë akuzuar Perëndimin për përshkallëzimin e tensioneve.
Vendet perëndimore, të udhëhequra nga Shtetet e Bashkuara, i kanë dhënë një paketë të paprecedentë mbështetjeje ushtarake Ukrainës për ta ndihmuar atë të luftojë kundër Rusisë.
Moska ka thënë se kjo e bën NATO-n pjesë të konfliktit, megjithëse të dyja palët kanë theksuar rëndësinë e shmangies së një konfrontimi të drejtpërdrejtë.
Ukraina nuk është anëtare e NATO-s, por po kërkon të bashkohet me Aleancën - e cila mbetet një perspektivë e largët.
Rusia thotë se aspiratat e Ukrainës për t'u bashkuar me NATO-n dhe zgjerimi i aleancës drejt lindjes pas rënies së Bashkimit Sovjetik në 1991 janë ndër arsyet që ajo pushtoi Ukrainën më 24 shkurt.
