Porti i Durrësit, Berisha: Rama e Basha bashkë. Flet për pazare në zgjedhje vendore “Një kandidat një pallat”

Nga OraNews Përditësimi i fundit 25 Nëntor 2022, 13:30

Krahas Edi Ramës, Sali Berisha nuk kurseu as Lulzim Bashën në akuzat për aferën sipas tij korruptive të projektit për Portin e Jahteve në Durrës. Kreu i PD, tha se kryeministri dhe ish kreu i opozitës janë bashkë në këtë aferë. Berisha tha se protesta e opozitës më 6 dhjetor do ti tregojë Bashkimit Europian fytyrën e Edi Ramës ndërsa shtoi se kandidatët e Alibeajt në zgjedhjet lokale janë njerëz të qeverisë. 

Debati i fortë për projektin e qeverisë për Portin e Jahteve në Durrës e detyroi Sali Berishën që krahas një përgjigje ndaj Edi Ramës, ti adresohet publikisht edhe Lulzim Bashës të cilin e sheh të përfshirë në këtë aferë.

Sali Berisha: “Në mënyrë absolute asnjë lloj qëllimi nuk ka nga Sali Berisha. Edhe Edi Rama nuk thotë emrat e aksionerëve se është i përfshirë me vëllanë e tij dhe kolegët e tij dhe këta aksionerë i kanë financat offshore. Këta janë të tillë, nuk kanë asgjë të përbashkët me popullin opozitar. Ju e patë se si ishin përzier aksionet. Nëse ka një akt të vërtetë makbethian të Ramës ishte përfshirja e kreut të opozitës në aferën e Durrësit"

Në zgjedhjet vendore të 14 majit 2023, duket se Partia Demokratike do të shkojë e ndarë në dy grupime, atë të Berishës dhe grupin Alibeaj. Kreu i PD përsëri nuk i kurseu akuzat, ndërsa tha se çdo kandidat që vjen nga Alibeaj është i Kryeministrit Rama.

Sali Berisha: Absolutisht vetëm të Edi Ramës. E di ti sa tendera ka fituar Kapllani? Ka fituar me dhjetëra tendera, përfshi pallatet ku u krijua keqtrajtimi më i shëmtuar ndaj qytetarëve te "5 Maji". Nuk ka forcë që ta tërheqë PD-në nga tenderat. PD është opozitë e vërtetë dhe jo grup i tendermenëve.

Kapllani ka një listë shumë të gjatë tenderash nga pushteti qendror dhe vendor. Ai është i detyruar. Atë e telekomandojnë. Atij i japin para. “Një kandidat një pallat” është në masën 80-90% e vërtetë.

Opozita është e vendosur që protesta e radhës të mbahet më 6 dhjetor, në të njëjtën ditë me samitin e Bashkimit Evropian me vendet e Ballkanit Perëndimor. Sipas Berishës, liderët evropianë do të shikojnë atë ditë të vërtetat e shqiptarëve dhe se Edi Rama nuk do të mund të kamuflojë se gjithçka në vend është perfekte.