Dhunohen banorët e pallatit 136/ U dorëzoi shkresën për shembje, polici i godet pas rezistencës
Nga OraNews Përditësimi i fundit 22 Nëntor 2022, 19:57
Banorët e pallatit 136 kanë denoncuar dhunën e ushtruar ndaj tyre në momentin kur i kanë kërkuar të lënë banesat pasi objekti do të shembej. Duke denoncuar edhe për veprim abuziv, ata shprehen se ndërtesa nuk është e dëmtuar, por sheshi kërkohet për interesa të tjera.
Këto janë pamjet nga dhuna e ushtruar ndaj banorëve të pallatit 136 në Tiranë. Shkak i konfliktit është bërë kërkesa prej bashkisë për të dalë nga shtëpitë, pasi ndërtesa do të shembej me argumentin e dëmtimit nga tërmeti.
Familjet e kanë konsideruar shkresën e paligjshme, ndërsa dënoncojnë shkeljet.
"Gent Alizoti po e vendoste në hyrje të pallatit njoftimin. Doli banori dhe po i fliste, i tha çfarë është kjo pa protokoll, asgjë. Ai u acarua, e qëlloi banorin, e shtriu përdhe."
Rastin thonë që e kanë denoncuar në polici, prej së cilës kërkuan dhe masa. Por as për forcat e rendit nuk kanë munguar akuzat.
"Në kanë bërë presion, lironi banesat!"
"Të premten për të hënën na kanë thënë hiqni plaçkat, ne si kemi hequr.Policët e rendit e thanë."
"Mbetëm duke ruajtur pallatin, nuk po shkojmë as në punë."
Banorët thonë se pallati nuk ka pasur dëmtime nga tërmeti.
"Ne na kanë thënë për riparim dhe e kthyen më pas. Kanë interesa të tjera."
Për këtë problematikë ata kanë edhe një çështje të hapur në Gjykatën Administrative të Shkallës së Parë prej së cilës presin vendimin.
