Studentët krijojnë kapele 'anti-kopje'
Nga OraNews Përditësimi i fundit 24 Tetor 2022, 08:45
Imazhet e studentëve që mbajnë të ashtuquajturat "kapele anti-kopje" gjatë provimeve të kolegjit janë bërë virale në mediat sociale në Filipine, duke shkaktuar reagime.
Studentëve në një kolegj në Legazpi City iu kërkua të mbanin një kapelë që do t'i pengonte ata të shikonin provimet e të tjerëve.
Shumë prej studentëve i krijuan vetë kapelat e tyre, me materiale si kartoni, kutitë e vezëve dhe materiale të tjera të riciklueshme.
Profesorja e tyre i tha BBC-së se ajo kishte kërkuar një "mënyrë argëtuese" për të siguruar "integritet dhe ndershmëri" në klasat e saj.
Mary Joy Mandane-Ortiz, një profesore e inxhinierisë mekanike në Kolegjin e Inxhinierisë Universitare Bicol, tha se ideja kishte qenë "me të vërtetë efektive".
Kjo mënyrë u zbatua për provimet e fundit afatmesme, të cilat u mbajtën nga qindra studentë në kolegj në javën e tretë të tetorit.
Profesorja Mandane-Ortiz tha se kërkesa e saj fillestare kishte qenë që studentët të bënin një dizajn "të thjeshtë" nga letra.
Ajo u frymëzua nga një teknikë e përdorur në Tajlandë disa vite më parë.
Profesorja tha se studentët e saj e pëlqyen idenë dhe filluan ta zbatonin - në disa raste duke krijuar kapele komplekse në "vetëm pesë minuta" me çdo material të mundshëm që gjenin përreth.
Të tjerë vunë kapele, helmeta ose maska të Halloween.
Një varg postimesh të profesores në Facebook - që tregonin të rinjtë të veshur me krijimet e tyre të përpunuara - sollën mijëra reagime brenda pak ditësh.
Ata gjithashtu se frymëzuan shkollat dhe universitetet në pjesë të tjera të vendit për të inkurajuar studentët e tyre që t'i bashkohen nismës së kapelave 'anti-kopje'.
Profesorja tha se studentët e saj dolën më mirë këtë vit, pasi ishin të motivuar nga kushtet e rrepta të provimit për të studiuar më shumë.
Ajo shtoi se shumë prej tyre i përfunduan testet e tyre herët dhe askush nuk u kap duke kopjuar këtë vit.
