Historia e dashurisë çon në tragjedi, tre viktima dhe dy të plagosur rëndë pas masakrës në Klos
Nga Spartak Doçi Përditësimi i fundit 12 Tetor 2022, 15:29
Tre viktima dhe dy të plagosur në gjendje të rëndë, është bilanci është një ngjarje tragjike në Klos, shkak i të cilës dyshohet se u bë një lidhje e kundërshtuar mes dy të rinjve. Fiqiri Mjeshtri, vrau babë e bir, Ilir e Kenardo Shirën, ndërsa la të plagosur Englantin e Renato Hasulën, po ashtu babë e bir. Pas krimit i dha fund jetës me të njëjtën armë.
Një histori dashurie u kthye në burim tragjedie. Një 17-vjeçari dhe të atit i kushtoi jetën.
Dy të tjerë mbetën të plagosur pa faj. Autori i masakrës u vetëvra.
Kjo ishte ajo që ndodhi në harkun e pak minutave në Klos.
E gjitha kishte nisur nga një lidhje e kundërshtuar mes të dy të rinjve.
17-vjeçari Kenardo Shira, sipas të dhënave, pëlqente dhe kishte ngacmuar vajzën e Fiqiri Mjeshtrit, personit që shihni në këtë foto.
Fiqiri Mjeshtri
Familja e këtij të fundit nuk ishte dakord dhe të mërkurë kishin lënë takim me adoleshentin dhe babanë e tij.
Fiqiri Mjeshtri kishte marrë me vete vellezërit Besnik dhe Fatmir Mjeshtrin.
Ndërsa në krah Kenardo dhe Ilir Shirës, ishin babë e bir Englantin e Renato Hasula, përkatësisht 39 dhe 14 vjeç.
Kafja e pajtimit mes fiseve nuk shkoi siç pritej.
Palët fillimisht u konfliktuan me fjalë në këtë lokal në mes të qytetit.
Shkak mësohet se u bë refuzimi i 17-vjeçarit për ta zyrtarizuar dashurinë në martesë.
Kur dolën prej aty, 39-vjeçari Fiqiri Mjeshtri sulmoi me pistoletë.
Plumbat i morën jetën në vend 17-vjeçarit Kenardo Shira, ndërsa i ati 46 vjeçar ndërroi jetë në spital si pasojë e plagëve.
Babë e bir Englantin e Renato Hasula ndërkohë mbetën të plagosur rëndë dhe po trajtohen në Spitalin e Traumës në Tiranë.
Pas krimit, tre anëtarët e fisit Mjeshtri u larguan me shpejtësi dhe kur u lokalizuan nga policia në fshatin Dars, aty 39-vjeçari Fiqiri Mjeshtri u dha fund jetës me të njëjtën armë.
Dy vëllezërit që akuzohen si bashkëpunëtorë në krim, u vunë në pranga.
Me tre viktima dhe dy të plagosur, ngjarja në Klos është një prej krimeve me bilancin më të rëndë për këtë vit e nisur nga konflikte familjare.
Për të shmangur një përplasje të re mes dy fiseve, në Klos u vendosën forcat Speciale të Policisë së Shtetit.
