Parku i sekreteve “Ghibli” në Japoni
Nga Besmira Pelushaj Përditësimi i fundit 12 Tetor 2022, 11:18
Magazina e madhe e sekreteve dhe arkitekturave ikonike të Studios “Ghibli” që keni parë në filma, tashmë do të jetë realitet. Kompania ka projektuar Parkun e parë “Ghibli” në Japoni që pritet të kthehet në një atraksion për vizitorë nga e gjithë bota prej muajit nëntor.
Parku i shumëpritur “Ghibli” në Japoni, që do të hapë dyert për vizitorët më 1 nëntor, është drejt përgatitjeve të fundit. Siti është ideuar nga “Ghibli”, një studio japoneze me seli në Tokio, e njohur për filmat artistikë të animuar si "My Neighbor Totoro" dhe fitues i Oskarit "Spirited Away". Parku është i ndarë në 5 seksione megjithëse vetëm tre prej tyre në rajonin Aichi të Japonisë qendrore do të jenë të aksesueshme fillimisht.
I shtrirë në një sipërfaqe mbi 7.1 hektarë, atraksioni përmban zona të mëdha natyrore. Ndryshe nga vizatimet e ngjashme turistike si Tokio Disneyland, krijuesit e parkut kanë thënë se është ideuar për të minimizuar fantazinë dhe për të pasqyruar realizmin e veprave të Ghibli.
Ndër tre zonat që do të hapen muajin e ardhshëm është "Kodra e Rinisë", porta për në park dhe me një kullë ashensori të frymëzuar nga disa filma të Ghibli, duke përfshirë "Kështjella në qiell" dhe "Kështjella lëvizëse e ulëritëse". Një atraksion tjetër do të jetë Magazina e Madhe.
Vizitorët mund të shëtisin përgjatë një rrugice të krijuar për t'u dukur si skena hapëse e "Spirited Away" ose të ulen në sediljen e trenit të mbuluar me kadife të kuqe në një karrocë pranë personazhit "Pa fytyrë" të filmit të njohur.
I ndërtuar me një kosto prej 232 milionë dollarë, parku pritet të kthehet në një atraksion turistik për Aichi. Rajoni parashikon një fluks prej 1.8 milionë vizitorësh në vit pasi të hapen të pesë zonat e parkut, nga viti i ardhshëm, me një ndikim ekonomik vjetor prej rreth 48 miliardë jenësh.
