Biden ndërron mendje, nuk beson se Putin do përdorë armë bërthamore
Nga Amado Çela Përditësimi i fundit 12 Tetor 2022, 09:39
Një javë pasi ngriti alarmin se Rusia do të përdorte armë bërthamore në Ukrainë, presidenti Joe Biden është tërhequr nga komentet e tij të mëparshme, duke thënë se nuk beson se Putin do të përdorë armë nukleare.
Presidenti i Shteteve të Bashkuara Joe Biden ka thënë se ai nuk beson që Rusia do të godasë me armë bërthamore Ukrainën.
"Nuk mendoj se do ta bëjë. Mendoj se është e papërgjegjshme që ai të flasë për këtë, idenë që një udhëheqës botëror i një prej fuqive bërthamore më të mëdha në botë, thotë se mund të përdorë një armë bërthamore taktike në Ukrainë", tha Biden.
Presidenti u tërhoq nga komentet e mëparshme që paralajmëronin asgjësim bërthamor në Ukrainë.
Javën e kaluar, Biden deklaroi se tensionet bërthamore ishin në pikën e tyre më të lartë që nga kriza e raketave kubane të viteve 1960.
I pyetur për të komentuar ato deklarata, zoti Biden vuri në dukje përllogaritje të gabuara të mundshme.
Që kur Biden paralajmëroi përdorimin e armëve bërthamore, administrata amerikane ka thënë se nuk ka shenja për përdorimin e tyre nga Moska.
