Aksionet e prodhuesve të çipave aziatikë bien pas kufizimeve të SHBA-së ndaj Kinës
Nga OraNews Përditësimi i fundit 11 Tetor 2022, 09:29
Aksionet e prodhuesve kryesorë aziatikë të çipave kompjuterikë kanë rënë pasi SHBA njoftoi masa të reja të ashpra për të kufizuar shitjet e teknologjisë në Kinë, shkruan BBC.
SHBA tha se do të ndalojë firmat amerikane që të shesin çipa të caktuar të përdorur për superkompjutera dhe inteligjencë artificiale firmave kineze.
Firmat e teknologjisë po shohin gjithashtu rënie të kërkesës ndërsa ekonomia globale ngadalësohet.
Të martën, aksionet e prodhuesit tajvanez të çipave TSMC ranë më shumë se 8% dhe Tokyo Electron në Japoni ranë me 5.6%.
Rënia erdhi pasi tregjet e aksioneve në Tajvan, Korenë e Jugut dhe Japoni u rihapën pasi u mbyllën për festat publike të hënën.
Gjithashtu, aksionet e prodhuesit më të madh të çipave të Kinës SMIC ranë me 2.5% në Hong Kong.
Sipas masave të njoftuara nga SHBA, kompanitë amerikane duhet të aplikojnë për një licencë për të furnizuar prodhuesit kinezë të çipave me pajisje që mund të prodhojnë çipa më të avancuar.
Uashingtoni tha se rregullat synonin të frenonin përparimet ushtarake dhe teknologjike kineze.
Masat, disa prej të cilave hyjnë në fuqi menjëherë, shënojnë një nga ndryshimet më të mëdha në politikën e SHBA-së drejt eksportimit të teknologjisë në Kinë në dekada.
Aksionet e teknologjisë në mbarë botën janë goditur gjithashtu javët e fundit nga kërkesa më e ulët për produkte elektronike, duke filluar nga kompjuterët tek telefonat inteligjentë.
Të premten, gjigandi i teknologjisë koreano-jugore Samsung paralajmëroi për një rënie prej 32% të fitimeve të tij.
Prodhuesi më i madh në botë i telefonave inteligjentë tha se fitimet nga biznesi i prodhimit të mikroprocesorëve vuajtën pasi çmimet globale të çipave të memories ranë për shkak të dobësimit të kërkesës për elektronikë të konsumit.
