Mbyllet java 7/ Teuta zhytet në fund të Superiores, Kastrioti ngjitet në mesin e artë të klasifikimit (FOTO)
Nga OraNews Përditësimi i fundit 8 Tetor 2022, 20:27
Në ndeshjen e dytë të ditës së shtunë në Kategorinë Superiore, Kastrioti i shkaktoi një humbje shumë të rëndë Teutës që nuk arrin të gjejë fitoren e parë sezonale edhe pse tashmë kanë kaluar 7 javë dhe jemi shumë pranë përfundimit të fazës së parë.
Skuadra e Emiljano Çelës zhvlerësoi golin e Erando Karabecit që kaloi fillimisht në avantazh Teutën që në minutën e 13. Krutanët gjetën forcë dhe reaguan në ndeshjen që u luajt në Kamëz. Pak minuta më vonë, po në pjesën e parë, Karakaçi barazoi shifrat ndërsa Morbej në minutën e parë shtesë të fraksionit të parë shënoi golin e fitores që i jep tre pikë shumë të rëndësishme Kastriotit që fiton ndaj një skuadre rivale në luftën për mbijetesën.
Teuta mbyll klasifikimin me 4 pikë, po aq sa Laçi ndërsa Kastrioti është ngjitur në kuotën e 9 pikëve dhe po rrugëton shumë i qetë drejt mesit të klasifikimit. Pas 7 javëve të para, Partizani kryeson bindshëm me 3 pikë diferencë nga Tirana ndërsa Kukësi ka fituar terren me suksesin e dytë rresht. Foto: LSA
