Tentoi të fuste kontrabandë rreth 219 mijë euro dhe verë, prangoset 50-vjeçari
Nga OraNews Përditësimi i fundit 25 Shtator 2022, 14:38
Policia kufitare në Vlorë ka finalizuar e koduar “Excise” ku janë kapur verë dhe euro të futura në mënyrë kontrabandë.
Konkretisht policia ka sekuestruar 218 885 euro të padeklaruara në kufi dhe një sasi vere, e dyshuar e kontrabanduar.
Një mjet kamion tip "DAF", me drejtues shtetasin A. B. Ka kaluar në vijën e dytë, për kontroll më të imtësishëm,
Gjatë kontrollit të ushtruar në automjetin që ky shtetas drejtonte, shërbimet e Policisë gjetën dhe sekuestruan 218 885 euro të padeklaruara sipas përcaktimeve ligjore në fuqi dhe kuti me shishe vere, pa faturë blerjeje.
“Kontrolle intensive nga shërbimet e Policisë Kufitare në Portin e Vlorës, në bashkëpunim me Seksionin e Hetimit të Krimit Ekonomik dhe Financiar në DVP Vlorë, për parandalimin, evidentimin dhe goditjen e krimeve ndërkufitare. Vihet në pranga 50-vjeçari që nuk deklaroi shumën e parave në kufi dhe tentoi të fuste kontrabandë sasinë e verës, në vendin tonë.
Në përfundim të veprimeve në kuadër të operacionit “Excise”, specialistët e Seksionit për Hetimin e Krimit Ekonomik e Financiar të DVP Vlorë arrestuan në flagrancë shtetasin A. B., 50 vjeç, banues në Vlorë, për veprat penale "Mosdeklarimi i të hollave dhe i sendeve me vlerë në kufi", "Pastrimi i produkteve të veprës penale” dhe “Kontrabanda me mallra për të cilat paguhet akcizë".” – njofton policia.
Në bashkëpunim me Prokurorinë e Rrethit Gjyqësor Vlorë vijon puna për zbardhjen dhe dokumentimin e plotë ligjor të këtij rasti.
