Kuvendi i Serbisë miraton raportin për dialogun me Kosovën
Nga Amado Çela Përditësimi i fundit 15 Shtator 2022, 10:05
4/5 e deputetëve serbë kanë miratuar raportin për dialogun me Kosovën debat i cili ka zgjatur rreth 25 orë. Në dokumentin 50 faqësh të prezantuar nga presidenti Vuçiç nuk përfshihet njohja reciproke.
Deputetët serbë kanë miratuar mëngjesin e së enjtes raportin për dialogun me Kosovën i cili është prezantuar nga presidenti Aleksandar Vuçiç.
Pro miratimit të dokumentit të titulluar “Raporti për procesin e negociatave me ‘institucionet e Prishtinës’, votuan 205 deputetë, ndërsa kundër ishin 57.
Raporti përbëhet nga 50 faqe në të cilin renditen kapitujt për asociacionin e komunave me shumicë serbe, policinë, gjyqësorin, energjinë, tryezën ekonomike, transportin e mallrave të rrezikshme, si dhe të zhdukurit që gjenden në fund të dokumentit.
Debati në Kuvendin e Serbisë për këtë raport zgjati dy ditë dhe u mori ligjvënësve rreth 25 orë.
Gjatë prezantimeve të tij, presidenti serb tha se nuk do ta njohë kurrrë pavarësinë e Kosovës.
Ai po ashtu shtoi se duhet të gjendet një zgjidhje realiste për Kosovën.
Partia më e madhe opozitare në Serbi, Partia e Lirisë dhe Drejtësisë, nuk votoi për miratimin e raportit.
Deputeti i vetëm shqiptar në Kuvendin e Serbisë, Shaip Kamberi, gjatë prezantimit të tij tha se, Kosova është e pavarur nga Serbia.
Kosova ka shpallur pavarësinë në vitin 2008 dhe Gjykata Ndërkombëtare e Drejtësisë ka konstatuar në vitin 2010 se pavarësia e saj nuk bie ndesh me ligjin ndërkombëtar.
Kosova dhe Serbia kanë nisur negociatat për normalizimin e marrëdhënieve më 2011, me ndërmjetësimin e Bashkimit Evropian.
