Samiti i Bërdo-Brionit/ Nisma kroato-sllovene synon bashkëpunimin ballkanik dhe integrimin
Nga Ora News Përditësimi i fundit 12 Shtator 2022, 12:12
Pak javë pas samitit të Ballkanit të hapur në Beograd, ka nisur këtë të hënë samiti i Bërdo – Brionit, në Slloveni. Nisma mban firmën e kroatëve dhe sllovenëve dhe ka në fokus zgjidhjen e problemeve të Ballkanit perëndimor dhe integrimin e tij në BE. Liderët më të rëndësishëm të Ballkanit janë pjesëmarrës në këtë samit.
Ka nisur këtë të hënë samiti i Bërdo Brionit në Slloveni.
Samiti në Bërdo të Sllovenisë ka në fokus situatën në Ballkanin Perëndimor. Presidentit slloven, Borut Pahor, mikpritësi, ka njoftuar pjesëmarrjen e zyrtarëve më të lartë ballkanik.
Presidenti shqiptar Begaj, presidentja e Kosovës, Vjosa Osmani, Gjukanoviçi nga Mali i Zi, presidenti i Serbisë Aleksandar Vuçiç, Stevo Pendarovski i Maqedonisë, Zoran Millanoviç i Kroacisë si dhe anëtarët e presidencës trepalëshe të Bosnjës, Shefik Xhaferoviç, Millorad Dodik dhe Zhelko Komshiq janë pjesëmarrës në këtë forum të rëndësishëm.
Ashtu si edhe më herët, kroatët dhe sllovenët kanë përforcuar thirrjen e tyre për integrimin e Ballkanit në Bashkimin Evropian.
Ballkani perëndimor ka marrë vëmendje të madhe në muajt e fundit nga Evropa dhe Amerika. Pika më e dobët e tij vijon të mbetet Bosnja dhe tendenca separatiste e serbëve të Bosnjes.
Gjithashtu, fokus të veçantë, tashmë edhe me dy të dërguar special gjerman dhe francez, ka marrë edhe zgjidhja e njohjes së ndërsjellë mes Kosovës dhe Serbisë.
Më herët, në Beograd u zhvillua takimi i radhës i Ballkanit të hapur, ku bëjnë pjesë Shqipëria, Serbia dhe Maqedonia.
Këtë radhë aty merrnin pjesë edhe ministri i jashtëm turk dhe ai hungarez, ndërsa kryeministri Rama ftoi italianët dhe grekët të bëhen pjesë e Ballkanit të hapur.
