Video/ Ylli komunist në Sunny Hill, Alibeaj: Jo e rastësishme, fyerje për vuajtjet e mijëra shqiptarëve
Nga OraNews Përditësimi i fundit 29 Gusht 2022, 11:33
Deputeti demokrat Enkelejd Alibeaj ka reaguar lidhur me shfaqjen e flamurit shqiptar me yllin komunist gjatë festivalit “Sunny Hill”.
Ai shkruan se është për të ardhur keq që asnjë nga organizatorët, përfshirë bashkinë e Tiranës dhe qeverinë nuk kanë reaguar ende për këtë akt të paprecedentë.
Sipas tij, shfaqja e simboleve të komunizmit nuk është diçka e rastësishme në një vend që ka vuajtur gjatë nën diktaturën e instaluar nga komunistët.
Alibeaj: Mediat kanë publikuar sot shfaqjen e simboleve të komunizmit gjatë festivalit “Sunny Hill” në Tiranë. Është për të ardhur keq që asnjë nga organizatorët, përfshirë bashkinë e Tiranës dhe qeverinë nuk kanë reaguar ende për këtë akt të paprecedentë. Shfaqja e simboleve të komunizmit nuk është diçka e rastësishme në një vend që ka vuajtur gjatë nën diktaturën e instaluar nga komunistët. Herë pas herë nostalgjikë dhe jo vetëm shfaqen me simbolet e diktaturës duke fyer kujtimin, vuajtjet dhe sakrificat e mijëra shqiptarëve.
Ndaj PD ka këmbëngulur gjithmonë se dekomunistizimi është një proces që duhet marrë seriozisht dhe trajtuar me respektin që meriton një komb që ka vuajtur kaq shumë dhe gjatë diktaturën komuniste. Për këtë arsye ne depozituam në Kuvend projektligjin tonë që parashikon dhe çështjen e simboleve të diktaturës dhe do depozitojmë atë për lustracionin. Lustracioni dhe dekomunistizimi janë procese që ecin bashkë dhe të ndara nga njëra-tjetra ato nuk mund të funksionojnë. Shoqëria shqiptarë ka nevojë për transparencë dhe seriozitet në trajtimin e një çështje që s'mund të jetë kurrsesi armë në duart e atyre që e përdorin për arsyet meskine të politikës së ditës.
Flamuri komunist gjatë festivalit “Sunny Hill” është si një formë satirike e grupit "Asgjë sikur Dielli" e realizuar 8 vite më parë nga Alban Nimani.
