Bullgaria nuk ka marrë asgjë konkrete me propozimin francez, thotë portali bullgar

Nga OraNews Përditësimi i fundit 24 Korrik 2022, 16:18

E vetmja gjë që Bullgaria mori nga propozimi francez për zhbllokimin e integrimit evropian të Maqedonisë së Veriut është përfshirja e bullgarëve në Kushtetutën e vendit para fillimit të negociatave për grupimet, dhe jo siç dëshironte Shkupi para përfundimit të procesit të negociatave për anëtarësim, vlerëson portali bullgar Fakti.bg në një koment kushtuar fillimit të negociatave të vendit me BE-në.

Sipas autorit të komentit, përveç kësaj, Bullgaria nuk ka arritur të mbrojë pozicionin e saj për gjuhën maqedonase, madje nuk ka marrë garanci të mjaftueshme për zbatimin e kërkesave lidhur me zbatimin e Marrëveshjes për miqësi, fqinjësi të mirë dhe bashkëpunim të nënshkruar në 2017.

"Atëherë si mund të supozojmë se propozimi është i mirë për ne?" De facto, ky propozim është një mace në thes dhe vetëm nacional-nihilistët jashtëzakonisht të papërgjegjshëm mund të pretendojnë se është i mirë në bazë të informacioneve që disponojmë”, vlerëson Fakti.bg.

Sipas portalit, pretendimi se propozimi francez mbron interesat bullgare "me precedentin e përfshirjes së marrëdhënieve dypalëshe ndërshtetërore në një kornizë evropiane për një proces negociator" është një manipulim i pastër i përfaqësuesve të autoriteteve në Sofje.

“Por e vërteta është se interesat tona nuk janë fare të mbrojtura plotësisht, sepse nuk ka përfshirje eksplicite të të gjitha kërkesave nga protokolli 4+1, por në fakt vetëm dy prej tyre, për përfshirjen e bullgarëve në Kushtetutën e Republikës të Maqedonisë së Veriut dhe për kufizimin e gjuhës së urrejtjes dhe diskriminimit (pa specifikuar). Problemi me refuzimin e Shkupit për të objektivizuar historinë dhe për të ndalur falsifikimet, ndryshimin e teksteve dhe tabelave të zeza dhe rehabilitimin e viktimave të komunizmit nuk përmendet në mënyrë eksplicite. Sa i përket gjuhës, është paraparë të nënshkruhen disa deklarata të njëanshme, të cilat qartazi janë në një drejtim multiperspektiv, sepse në të kundërtën do të ishte një deklaratë e përbashkët, e cila nuk do të ishte në interesin tonë”, thotë Fakti.

Sipas portalit, nuk janë të vërteta edhe pretendimet e autoriteteve bullgare se “negociatat e anëtarësimit mund të ndërpriten në çdo moment, nëse konstatohet mospërmbushja e marrëveshjes”.

“Teorikisht, ne mund të vëmë veton në çdo kapitull të negociatave, nëse kemi argumentet e nevojshme. Megjithatë, shumica e kapitujve si Bashkimi Doganor, Bashkimi Ekonomik, Politika Sociale, Energjia, Bujqësia, Statistikat, Peshkimi, Mjedisi, Kontrolli Financiar etj nuk kanë të bëjnë fare me kërkesat tona”, shtohet në tekst.

Sipas autorit të komentit, në praktikë, vetëm një pjesë e vogël e kushteve bullgare, por edhe kjo nuk është e sigurt, do të mund të mbulohet vetëm në kapitujt Arsimi dhe Kultura, Politika Rajonale, Marrëdhëniet me Jashtë dhe Vlerat Themelore.

“Por ne nuk do të mund të kërkojmë asgjë konkrete apo thelbësore gjatë negociatave nëse kërkesat tona në masën e tyre të plotë nuk përfshihen shprehimisht në kornizën e negociatave”, përfundon komenti i Fakti.bg