Humbje që dhemb/ Tirana dënohet nga luksemburgasit modestë, eleminohet në Champions (Video & Foto LSA)
Nga OraNews Përditësimi i fundit 12 Korrik 2022, 22:01
Zhgënjim, eleminim që Tirana do ta mbajë mend gjatë. Nuk ia del mbanë në misionin “remuntada” kampionia e Shqipërisë që pësoi një disfatë të rëndë nga luksemburgasit e Diddelinge 2-1 në “Air Albania Stadium” të cilët u treguan një skuadër më e bindur dhe cinikë për të rrëmbyer biletën e fazës së dytë të UEFA Champions League.
Kombinuar kjo humbje me atë të ndeshjes së parë 1-0, e penalizon automatikisht 26 herë kampionen e Shqipërisë dhe e dërgon në UEFA Conference League.
Pjesë e parë pozitive por e dyta “horror” për skuadrën e Orges Shehit që vuajti mungesën e Limajt në mesfushë dhe pësoi dy gola të shpejtë në fillimin e së dytës nga Bojic dhe Sinani, sulmuesi i luksemburgasve me origjinë shqiptare.
Bardheblutë e nisën ndeshjen me ritmin e duhur madje në të 15-tën De Silva bëri më të vështirën teksa e stampoi topin më shtyllë, ndërsa Seferi nga e djathta mbajti gjallë flakën e sulmit.
Gjithsesi, sulmuesi i Kombëtares dhe Xhixha nuk arritën të bënin më shumë përveç një goli në fund që nuk dha asnjë sinjal shprese.
Dy sulmuesit kryesisht në hije e dënuan ekipin bardheblu që u mbështet nga një numër i konsiderueshëm tifozësh por në fund i zhgënjeu me një eleminim të merituar.
Tashmë Tirana do ta vazhdojë rrugëtimin europian në raundin e dytë të Conference League kundër boshnjakëve të Zrinjski Mostar.
.
