Mbeten në qeli pronari dhe punëtorët e shtëpisë së barit të zbuluar në Koplik
Nga OraNews Përditësimi i fundit 9 Qershor 2022, 15:36
Tre të arrestuarit në shtëpinë e barit të zbuluar në Koplik gjatë operacionit “Syri i Sheganit” mbetën në qeli.
Gjykata e Shkodrës, caktoi masën e sigurisë “arrest me burg” për 64 vjeçarin Ramiz Nikdukaj pronar I banesës së përshtatur për rritjen e bimëve narkotike.
Me të njejtën masë do të hetohen edhe Bashkim Kovaçi 64 vjeç e Altion Luli 43 vjeç, të dy banorë të Cërrikut, që u kapën duke u kujdesur për kanabisin në Malësi të Madhe.
64 vjeçari Nikdukaj sipas policisë kishte përshtatur në banesë një ambient për kultivim të bimëve narkotike nëpërmjet llambave.
Aty nën ngrohtësinë e llampave po kultivoheshin 455 bimë narkotike.
245 bimë të tjera po rriteshin në oborrin përreth banesës.
Ndërsa 22 kilogram kanabis sativa u gjetën në gjendje të tharë gati për tu shitur.
Almir Nikdukaj, djali i 64 vjecarit u shpall në kërkim, ndërsa vajza e tij po hetohet në gjendje të lirë.
Në dëshminë e parë Ramiz Nikdukaj që rezulton i punësuar si roje pranë Bashkisë Malësi e Madhe, deklaroi se kishte kthyer banesën në Shtëpi bari për shkak të gjendjes ekonomike.
Pas shqyrtimit të provave, gjyqtari Andri Ymeri pranoi kërkesën e prokurorit Vat Staka për ti mbajtur të tre të akuzuarit në burg.
Laboratori i rritjes së bimëve narjkotike përmes ngrohjes me llampa u zbulua gjatë aksionit për kapjen e tre personave të dyshuar për grabitjen e bankës së nivelit të dytë më 9 Maj në Koplik.
