Greqi - Shqipëri: Drejt rinovimit të paktit të miqësisë edhe për 5 vite të tjera
Nga OraNews Përditësimi i fundit 6 Qershor 2022, 17:05
Sipas burimeve diplomatike, qeveria shqiptare është pro rinovimit të marrëveshjes pesëvjeçare për miqësinë, bashkëpunimin, fqinjësinë e mirë dhe sigurinë mes Greqisë dhe Shqipërisë, pas një propozimi grek, bëjnë me dije mediet greke.
Ky pakt u nënshkrua mes dy vendeve në vitin 1996 dhe kishte një kohëzgjatje fillestare, nga dita e zbatimit, 20 vjet, e cila përfundoi në vitin 2018.
Më pas u rinovua për një periudhë pesëvjeçare, deri në vitin 2023.
Në funksion të skadimit të këtij rinovimi, të dyja palët ranë dakord për rinovimin e tij edhe për pesë vite të tjera.
Ky zhvillim është pjesë e përmirësimit të vazhdueshëm të klimës në marrëdhëniet mes dy vendeve, gjë që u la të kuptohet gjatë vizitës së Ministrit të Jashtëm Nikos Dendias në Tiranë në tetor 2020, si dhe takimit të tij të fundit me kryeministrin shqiptar Edi Rama.
