Rrugëtimi i tij nuk është nga ato historitë e përrallave. Besmir Bitraku rrëfen si u bë pjesë e artit
Nga OraNews Përditësimi i fundit 3 Qershor 2022, 19:44
Besmir Bitraku është një ndër artistët shqiptarë që ka spikatur për sa i përket teatrit dhe kinematografisë.
Ai është prej shumë vitesh tashmë pjesë e shfaqjeve të shumta. Bitraku ka ditur të rrëmbejë vëmendjen dhe duartrokitjet e publikut shqiptar.
Besmir Bitraku nuk ka ardhur rastësisht në botën e artit, ai rrjedh nga një familje aktorësh, është djali i të madhit Marko Bitraku i cili ka lënë gjurmë të padiskuteshme në artin shqiptar me rolet e tij humorin brilant dhe karakteret e papërsëritshme që ka realizuar.
I ftuar në emisionin “Jeto me orën” Besmir Bitraku rrëfeu më shumë për karrierën e tij artistike si dhe për planet e së ardhmes.
Ndërsa kthehet pas në kohë Besi shprehet, “E gjej veten në ndriçmimin e teatrit të Korçës ku babi im bënte prova”.
Historia e lidhjes së tij me artin nuk është nga ato historitë e përrallave që kemi dëgjuar shpesh si ëndrrat e fëmijërisë, por ajo që ka ndodhur me të është krejt rastësore madje si shprehet se as vetë ai nuk e di sesi përfundoi drejt artit.
Babai i tij nuk e shtynte drejt artit sepse mendonte se kinematografia në Shqipëri nuk ka të ardhme.
Së fundmi Besi është i angazhuar si regjisor i shfaqes “Përvjetori i ditëlindjes”, një shfaqe që ka bërë bashkë një kast aktorësh me shumë peshë në kinematografinë shqiptare dhe një shfaqje që premton shumë emocion.
