Protesta ndahet në dy grupe, në 1 Maj kërkohet t'u jepet mundësia të qëndrojnë në atdhe
Nga Sonila Musai Përditësimi i fundit 1 Maj 2022, 15:15
Në Ditën Ndërkombëtare të Punëtorëve, qytetarë dhe aktivistë të shoqërisë civile zgjodhën të protestojnë.
"Festë për çfarë, festë për shfrytëzimin, shtypjen?"
Edhe pse të paktë në numër, pjesëmarrësit u ndanë në dy grupime si në marshimin e nisur para sheshit "Skënderbej", ashtu dhe në fjalimet e mbajtura para Kryeministrisë.
Me pankarta në duar, ata kërkuan të respektohen të drejtat e punëtorëve, të rriten pagat në mënyrë që të përballojnë jetesën.
"Të rritet paga minimale, punëtorët shqiptarë nuk mund të punojnë më me 300 mijë lekë."
"Nëqoftëse këto punë vazhdojnë kështu e gjithë Shqipëria do të shndërrohet si ato qytetet periferike."
Protestës ju bashkua dhe kjo nënë me 4 fëmijë ku u shpreh se jetesa për të është e papërballueshme.
"Çfarë të marr me 300 mijë lekë? Shkoj në bashki, më përzë."
Ky i moshuar kishte dalë për vajzën e tij, e cila dhe pse ka mbaruar studimet është e papunë.
"Është pa punë, ka mbaruar ekonomikun në shkollë të mesme."
Të pranishëm ishin dhe përfaqësues të Sindikatës së taksistëve dhe minatorëve ku shprehën padrejtësitë e që hasin si pasojë e keqqeverisjes.
"Është ngritur Bordi i Transparencës, janë mbledhur një tufë atje. Çuditërisht llogaritë i bëjnë kaq mirë sa kur e ulin, e ulin 3 lekë dhe kur e ngrejnë e ngrejnë 10 lekë."
"Duhet të ishin përballë punëtorëve dhe jo të rrinë në zyra duke festuar 1 Majin sepse 1 maji është i joni."
Ndryshe nga protestuesit në shesh, politikanët kanë uruar 1 Majin përmes postimeve në facebook, ku një pjesë u ndal te përmirësimi i kushteve dhe pjesa tjetër te akuzat për thellim të varfërisë e shkelje të të drejtave të njeriut.
