Zjarr në një banesë në Patos, digjet 73-vjeçari (Pamje)
Nga OraNews Përditësimi i fundit 27 Prill 2022, 13:04
Një ngjarje e rëndë ka ndodhur në fshatin Verbas të Patosit. Një zjarr i madh mësohet se ka rënë në një banesë, ndërsa brenda saj ndodhej një 73 vjeçar. Flakët e rëna i kanë shkaktuar djegien dhe më pas vdekjen Sabri Serdarit.
Banesa e familjes Serdari në fshatin Verbas të bashkisë Patos u përfshi nga flakët mesditën e kësaj të mërkure.
Brenda në banesë në momentin që kjo e fundit u përfshi nga flakët ishte edhe kryefamiljari 73 vjeçar Sabri Serdari i cili ndërroi jetë në vend për shkak të djegies.
Mësohet se 73 vjeçari ishte vetëm në banesë pasi bashkëshortja nuk ndodhej aty, ndërsa e ka pasur të pamundur të dalë në momentet e para të flakëve pasi ishte i paralizuar.
Sabri Serdari kishte 10 vite që jetonte në këtë banesë me qira së bashku me bashkëshorten.
Në momentin e flakëve fqinjët tregojnë se e kanë pasur të pamundur të ndërhyjnë për shkak se u përhap me shpejtësi dhe përfshiu të gjithë godinën.
Për të shuar flakët e banesës u angazhuan dy forca zjarrfikëse.
Dëmet materiale kanë qenë të shumta dhe në banesë thuajse nuk mbeti më asgjë nga flaka që e përfshiu të gjithë shtëpinë private.
Sakaq trupi i pajetë i 73 vjeçarit Sabri Serdari u përcoll për në morgun e qytetit të Fierit, teksa policia po punon për të zbuluar shkaqet e zjarrit.
