Anulimi i vendimit në arbitrazh, qeveria shqiptare i paguan 65 milionë lekë të vjetra studios ligjore

Nga OraNews Përditësimi i fundit 20 Prill 2022, 22:36

Duket se qeveria shqiptare do të paguajë miliona euro të tjera në arbitrazh ndërkombëtar për kontrata të anuluara.

Ky është rasti edhe shpërblimi e studios “Gowling” WLG për procesin e anulimit të vendimit të arbitrazhit ndërkombëtar, datë 20.3.2020, ICSID Case no.ARB/14/26.

Ky arbitrazh i anuluar ishte ndërmjet shoqërisë “Albaniabeg Ambient”, sh.p.k., dhe të tjerë (“M.Angelo Novelli” dhe “Costruzioni S.R.L.” “IÇ kundër Hydro S.R.L.””,), kundër Republikës së Shqipërisë.

Kështu qeveria shqiptare i ka kaluar ministrisë së Turizmit dhe Mjedisit plot 65 000 000 lekë që do të përballohen nga fondi rezervë i buxhetit të shtetit për vitin 2022.

Vendimi:

NJË SHTESË FONDI NË BUXHETIN E VITIT 2022, MIRATUAR PËR MINISTRINË E TURIZMIT DHE MJEDISIT NGA FONDI REZERVË I BUXHETIT TË SHTETIT PËR VITIN 2022, PËR PAGESËN E STUDIOS PËR ÇËSHTJEN E ANULIMIT TË VENDIMIT TË ARBITRAZHIT ICSID CASE NO. ARB/14/26

Në mbështetje të nenit 100 të Kushtetutës, të neneve 5 e 45, të ligjit nr.9936, datë 26.6.2008, “Për menaxhimin e sistemit buxhetor në Republikën e Shqipërisë”, të ndryshuar, dhe të nenit 14, të ligjit nr.115/2021, “Për buxhetin e vitit 2022”, të ndryshuar, me propozimin e ministrit të Turizmit dhe Mjedisit, Këshilli i Ministrave

VENDOSI:

1. Ministrisë së Turizmit dhe Mjedisit, në buxhetin e miratuar për vitin 2022, në zërin “Shpenzime korente”, të programit buxhetor 01110 “Planifikim, menaxhim, administrim”, i shtohet fondi prej 65 000 000 (gjashtëdhjetë e pesë milionë) lekësh, për kryerjen e pagesës për detyrimet që rrjedhin ndaj studios “Gowling” WLG për procesin e anulimit të vendimit të arbitrazhit ndërkombëtar, datë 20.3.2020, ICSID Case no.ARB/14/26, ndërmjet shoqërisë “Albaniabeg Ambient”, sh.p.k., dhe të tjerë, kundër Republikës së Shqipërisë.

2. Efekti financiar prej 65 000 000 (gjashtëdhjetë e pesë milionë) lekësh të përballohet nga fondi rezervë i buxhetit të shtetit, i miratuar për vitin 2022.

3. Ngarkohen Ministria e Turizmit dhe Mjedisit dhe Ministria e Financave dhe Ekonomisë për zbatimin e këtij vendimi.

Ky vendim hyn në fuqi menjëherë dhe botohet në “Fletoren zyrtare”.

KRYEMINISTRI
EDI RAMA