Mes fekalesh në Tiranë, plehra dhe ujëra të zeza në lagjen e "Pallatit të Verdhë"
Nga Sonila Musai Përditësimi i fundit 20 Prill 2022, 17:39
Lagjia e njohur si rruga e Shkodrës afër terminalit të veriut në Tiranë është lënë në mëshirë të fatit. Fëmijë e të moshuar nuk kanë një vend ku të qëndrojnë pasi lagjen e kanë pushtuar mbeturinat dhe ujërat e zeza që kanë dalë në sipërfaqe, duke u bërë rrezik për infeksion për banorët aty.
Plehrat dhe ujërat e zeza në rrugën e Shkodrës ose e njohur ndryshe si zona e Pallatit të Verdhë, janë shqetësimi më i madh i banorëve aty.
Me këtë situatë ata përballen prej vitesh.
Ujërat e zeza kanë dalë në sipërfaqe ndërsa askush nga institucionet përkatëse nuk është kujdesur të marrë asnjë masë.
Mbeturinat janë një tjetër shqetësim, burim për infeksion.
Ujërat e zeza dhe plehrat kanë shpërthyer jo vetëm buzë rrugës, por edhe në brendësi të këtij blloku pallati.
Thirrja e banorëve i drejtohet Bashkisë që të ndërhyje në përmbushje të detyrimit, pasi ata jane taksapagues të rregullt e nuk kanë marrë asnjë shërbim.
