Neutraliteti indian për luftën në Ukrainë, amerikanët dhe rusët zbarkojnë në New Dehli për bisedime
Nga OraNews Përditësimi i fundit 30 Mars 2022, 13:27
India ka mbajtur një pozicion neutraliteti dhe të paangazhuar me asnjë palë deri më tani sa i përket luftës në Ukrainë. Për rezolutat që denojnë sulmet ruse ajo ka abstenuar. Në kryeqytetin e gjigantit aziatik, në ditët në vijim, pritet të mbërrijnë zyrtarë të lartë rusë dhe amerikanë për të zhvilluar bisedime. Rusët kërkojnë që India të paguajë naftën me rubla, teksa amerikanët e duan Indinë me vete në planet e tyre për përballjen me Kinën dhe problemet e tjera globale.
India deri më tani ka mbajtur një qëndrim neutral sa i përket sulmit rus ndaj Ukrainës. Më herët, India ka abstenuar në rezolutat e OKB për dënimin e sulmit rus ndaj Ukrainës dhe, sipas ekspertëve, ka rritur vëllimin e shkëmbimeve tregëtare me Rusinë në energjitikë dhe burime të tjera natyrore.
Këshilltari kryesor indiano-amerikan dhe një ndër arkitektët kryesor të sanksioneve ekonomike të Uashingtonit kundër Moskës, Daleep Singh, do të vizitojë Indinë më 30 dhe 31 mars për të diskutuar "pasojat" e luftës së Rusisë kundër Ukrainës dhe zhvillimin e një korinize ekonomike për rajonin e Indo – Paqësorit, ka njoftuar Shtëpia e Bardhë.
Udhëtimi i zyrtarit të lartë amerikan Singh përkon me vizitën e ministrit të Jashtëm rus Sergey Lavrov në Indi, i cili mbërrin në New Dehli pas përfundimit të një udhëtimi dy-ditor në Kinë.
Amerikanët kanë ndërmarrë nisma të ndryshme në rajonin e Azi – Paqësorit për të frenuar rritjen e Kinës, teksa India është një partner i rëndësishëm amerikan në këtë plan.
“Zëvendës këshilltari i sigurisë kombëtare për ekonominë ndërkombëtare, Singh do të jetë në Nju Delhi më 30 dhe 31 mars dhe do të konsultohet me homologët për pasojat e luftës së Rusisë kundër Ukrainës dhe zbutjen e ndikimit të saj në ekonominë globale”, tha Shtëpia e Bardhë.
Edhe ministri i Jashtëm rus Sergey Lavrov do ta vizitojë Indinë gjatë javës së ardhshme dhe fokusi kryesor pritet të jetë diskutimi mbi pagesat e Nju Delhit për naftën dhe pajisjet ushtarake ruse.
Sanksionet perëndimore ndaj Rusisë kanë krijuar vështirësi në kryerjen e pagesave për atë vend. Mësohet se të dyja palët kanë kërkuar aktivizimin e sistemit të pagesave rupi-rubla.
