Kremlini thotë se nuk ka asgjë “premtuese” nga bisedimet me Ukrainën
Nga OraNews Përditësimi i fundit 30 Mars 2022, 13:24
Kremlini ka minimizuar shpresat se është arritur përparim pas bisedimeve të paqes midis delegacioneve ruse dhe ukrainase që u mbajtën në Stamboll një ditë më parë.
“Ne nuk mund të themi se ka pasur diçka shumë premtuese apo ndonjë përparim”, tha zëdhënësi i Kremlinit, Dmitry Peskov për gazetarët.
Ai shtoi se Moska e konsideron “pozitive” faktin që Kievi ka filluar që t’i shkruajë kërkesat e saj.
Ndërkohë Guvernatori rajonal i rajonit lindor ukrainas të Donjeckut, Pavlo Kyrylenko, tha se Rusia po granaton pothuajse të gjitha qytetet që gjenden në vijën e frontit në këtë rajon.
Që prej vitit 2014, separatistët e mbështetur nga Rusia, luftojnë me forcat ukrainase në Donjeck.
Kyrylenko tha se granatimet po vijnë nga zonat e Donjeckut që kontrollohen nga separatistët pro-rusë.
Sipas tij, në mëngjesin e sotëm ka pasur sulme ajrore në Marijnka dhe Novomihajlivka. Ai ka postuar në Twitter pamje të shkatërrimeve.
Rusia ka njoftuar se do të përqendrohet që të marrë kontrollin e rajoneve lindore të Ukrainës.
