Lufta në Ukrainë në ditën e 19-të, sot raundi i katërt i bisedimeve për paqe me Rusinë
Nga OraNews Përditësimi i fundit 14 Mars 2022, 07:53
Lufta në Ukrainë ka hyrë këtë të hënë, 14 mars, në ditën e 19-të.
Delegacionet e Ukrainës dhe Rusisë pritet të zhvillojnë sot një raund të ri bisedimesh për paqe.
Takimi do nisë në 10:30 me orën lokale, sipas Anton Gerashchenko, këshilltar i ministrit të brendshëm të Ukrainës.
Dmitry Peskov, negociator i Rusisë dhe sekretar për media i presidentit rus, Vladimir Putin, paralajmëroi se bisedimet do të zhvillohen përmes video-konferencës.
Mykhailo Podolyak, negociator i Ukrainës dhe këshilltar i presidentit të këtij vendi, Volodymyr Zelensky, e konfirmoi deklaratën e Kremlinit.
Në një video të postuar në mediat sociale, Podolyak tha se Rusia po fillon të angazhohet në mënyrë konstruktive në bisedime.
“Rusia tani e percepton në mënyrë shumë më adekuate botën përreth saj. Ajo është shumë më e ndjeshme ndaj pozicionit të Ukrainës, që është dëshmuar në fushën e betejës, dhe në veprimet e Ukrainës në drejtim të mbrojtjes së interesave të saj”, tha Podolyak.
Të dielën, Zelensky tha se delegacioni i tij është në bisedime me homologët rusë çdo ditë.
“Delegacioni ynë ka një detyrë të qartë - të bëjë gjithçka për të siguruar një takim të presidentëve. Takim që jam i sigurt se njerëzit po e presin”, tha Zelensky në një video-adresim.
Rusia ka thënë më herët se Kremlini nuk do të refuzonte një takim të tillë, për të diskutuar çështje “specifike”, por nuk ka pasur detaje të mëtejshme në këtë drejtim.
