Me arsenal armësh dhe kanabis në makinë, pranga katër të rinjve në Tropojë
Nga OraNews Përditësimi i fundit 5 Mars 2022, 09:59
Kultivimi i kanabisit nuk është më fenomen në shtëpitë e barit në Tiranë dhe në qytete të tjera.
Katër të rinj janë ndaluar në aksin rrugor Bajram Curri-Tropojë, në kryqëzimin e fshatit Sopot, duke lëvizur me automjetet tip "Volkswagen" dhe "Benz".
Në një prej makinave janë zbuluar të paktën 6 thasë plastikë me lëndë narkotike.
Në deklaratën për mediat bëhet e ditur se pas peshimit rezultoi një sasi prej 33 kilogramë e dyshuar lëndë narkotike.
Nga pamjet e ofruara prej policisë duket se bëhet fjalë për kanabis.
Operacioni është koduar me emrin "Fierza 2022", teksa thuhet se informacioni për lëvizjen e tyre në orët e vona të natës është marrë në rrugë operative.
Të ndaluarit të moshës nga 26-35 vjeç kishin marrë dhe masa të forta mbrojtëse nëse do të binin pre e grabitjeve.
Pas kontrollit në mjetin tip "Benz" janë zbuluar 3 armë zjarri, 1 automatik, 1 mitroloz i lehtë dhe një pistoletë ECOL.
Tashmë ndaj tyre do të rëndojnë akuzat "Prodhimi dhe shitja e narkotikëve" dhe "Mbajtja pa leje e armëve luftarake dhe e municionit", kryer në bashkëpunim.
