Çernobili u kap nga forcat ruse, dalin pamjet e tankeve jashtë ish-stacionit bërthamor

Nga OraNews Përditësimi i fundit 24 Shkurt 2022, 19:13

Uzina bërthamore e Çernobilit është pushtuar nga forcat ruse, tha të enjten një këshilltar i Zyrës presidenciale të Ukrainës, Mykhailo Podolyak.

“Është e pamundur të thuhet se termocentrali bërthamor i Çernobilit është i sigurt pas një sulmi krejtësisht të pakuptimtë nga rusët”, tha ai.

"Ky është një nga kërcënimet më serioze në Evropë sot", tha Podolyak.

Një video, e verifikuar nga BBC, duket se tregon tanke ruse të stacionuara jashtë ish-stacionit të energjisë bërthamore.

Ndërkohë një qytetare ukrainase shkruan në rrjetet sociale.

"Po, 30 minuta më parë humbëm kontrollin e stacionit atomik të Çernobilit. Që nga mëngjesi, një qytet afër Kievit është nën sulm masiv të aviacionit dhe është shumë e frikshme. Ka një aeroport ushtarak dhe 34 helikopterë rusë po përpiqen të zbarkojnë ushtarët e tyre. Është vetëm 20 km larg. Ne qëndrojmë së bashku me një çantë shpine me dokumente, ushqime dhe disa rroba në pritje të sulmit të radhës. Pritet në orën 22:00.Shumë avionë ushtarakë ukrainas po fluturojnë".

Çernobili ishte vendi i një prej fatkeqësive më të këqija bërthamore në histori, kur një nga katër reaktorët e tij shpërtheu në vitin 1986.