Dënimi i ish-ministrit Tahiri, Dhoma Amerikane e Tregtisë: Të pandershmit e fuqishëm janë në panik
Nga OraNews Përditësimi i fundit 6 Shkurt 2022, 11:55
Dhoma Amerikane e Tregtisë në Shqipëri deklaron se dënimi i ish-ministrit të Brendshëm, Saimir Tahiri ka ndezur disi sinjalin e parë se drejtësia në Shqipëri po nis të zgjohet.
Presidenti i kësaj Dhome, Enio Jaço, thotë se pavarësisht masës së dënimit që kërkon guxim dhe “stomak të fortë” ligjor e profesional, fakti se zyrtarë apo ish-zyrtarë në nivelet më të larta të qeverisë mund të ndëshkohen po ç’rrënjos kulturën primitive, që përbën thelbin e problemeve në Shqipëri.
"Një fenomen i ngritur me shqetësim nga Dhoma Amerikane për padrejtësitë që prej vitesh vuajnë bizneset e ndershme në dyert e gjykatave, e që gjithashtu mban larg investitorët e huaj" thotë ai.
Por Jaço nënvizon se vendimi për ish-ministrin, s’do të thotë se Drejtësia sot është “perfekte”.
"Njerëzit kanë të drejtë të jenë skeptikë, sepse Shqipëria në historinë e saj nuk e ka njohur pothuajse kurrë Shtetin Ligjor, ka vuajtur nga një “Drejtësi e Përçudnuar” nën regjimin komunist, e më pas ka vuajtuar një Kapje të saj pas viteve ’90".
Ky mund të jetë një fillim i gjatë në kohë, vijon ai, megjithatë sado i vakët të jetë ka bërë që sot disa njerëz të ndershëm të ndihen pak më mirë, disa të heshtin dhe të presin më tej dhe disa të pandershëm por të fuqishëm të ndihen në siklet, e ndoshta dhe në panik.
Dhomën Amerikane e Tregtisë thekson se që drejtësia të nisë të gëzojë besueshmërinë e njerëzve do duhet kohë, dhe më shumë vepra reale të tilla, që të nisë të japë efektet e saj.
