Ora Investigim/ Punonjësi i HAKO-s aksidentohet në punë, kompania ‘fshin gjurmët’e mjekon në klinikë private
Nga Alketa Çeku Përditësimi i fundit 2 Shkurt 2022, 15:44
Aksidenti i ndodhur në orarin e punës ne ambientet e fabrikës sallamit HAKO dhe fshehja e këtij rasti nga ana e kompanisë ka bëre që shtetasi Genc Kallari t’i drejtohet RTV Ora.
Edhe pse HAKO shpk e ka detyrim ligjor për te lajmëruar menjëherë Inspektoriatin Shtetëror të Punës në rast aksidenti, ky rast është fshehur duke e dërguar punëtorin e dëmtuar te një klinikë private.
"Jam vrarë në punë, kam pësuar një aksident te kompania Hako dhe nuk m,ë kanë çuar as në spital. Më kanë çuar te shtëpia private e punëtorit."
Shtetasi Genc Kallari është detyruar për të bërë nje punë që nuk ka qenë në profilin e tij dhe si pasoje ka dëmtuar dorën.
"Aty më thanë që do transportoja bombolat e gazit. Nuk ishte profili im i punës, unë kisha profil tjetër."
Në mungesë të ndihmës së shpejtë ky xhup pune i gjakosur me logon HAKO i ka shërbyer punonjësit të dëmtuar për të mbështjellë dorën dhe për t’i dhëne vetes ndihmën e parë në momentin që ndodhi aksidenti.
Për të fshehur aksidentin në punë përfaqësues të HAKOS nuk e kanë dërguar punëtorin e dëmtuar në Spitalin e Traumës por te klinika e një mjeku privat.
"Një inxhinier teknik mori një doktor që kishte njogje Hako-n dhe i tha që ta sjellim te shtëpia jote. Te shtëpia e atij kam qepur dorën."
‘Ora investigim’ ka zbuluar se personi që i ka dhënë ndihmën e parë në ambientet e klinikës private duke fshehur aksidentin është një infermier i Spitalit të Traumës .
Qytetari: Nuk më merrje përsipër të më qepje dorën te shtëpia.
Infermieri: Po pse këtu çfarë do bëja unë? Këtu çfarë do t'i bëja? Tani dorës çfarë t'i bëj unë? Të të jap dorë tjetër? Atë dorë e ke dëmtuar.
Pas ballafaqimit me shtetasin Genc Kallari infermieri i Spitalit të Traumës thërret një ortoped për t'i parë edhe një here dorën pacientit te dëmtuar.
Infermieri: E kam qepur unë këtë dhe e ke parë ti atëherë. Të gjithë kanë qenë të çarë.
Mjeku ortoped: Mund të bësh disa ndërhyrje, një, dy, tre, katër që ta hapësh dhe ta pastrosh, por garanci nuk ke.
Qytetari: Po mua më kanë quajtur dëmtim të lehtë aty. A quhet dëmtim i lehtë ky?
Mjeku ortoped: Ky nuk quhet dëmtim i lehtë për sa kohë që ti nuk arrin të mbyllësh gishtat.
Qyetatri: Eh sa veta janë vrarë atje, ata nuk i sjellin në spital.
Mjeku ortoped: Po ti si ke ardhur atëherë?
Infermieri: E mora unë. E kam mjekuar unë.
Qytetari: Më ka mjekuar ky pastaj më ka sjellë këtu.
Infermieri: E mjekova unë.
Në ditët n vijim ‘Ora investigim’ do të sjelle të tjera fakte se çfarë vendimi ka marrë Inspektoriati Shtetëror i Punës pas inspektimit që kreu ne ambientet e HAKO-s dhe ‘ofertën’ që i bëhet punonjësit të dëmtuar në shkëmbim të rikthimit në punë.
