Në motor pa kaskë në kokë, humb jetën 29-vjeçari në Divjakë, u përplas me makinën
Nga OraNews Përditësimi i fundit 17 Janar 2022, 11:57
Mospërdorimi i kaskës mbrojtëse në drejtimin e motorit është një prej shkaqeve që ka shkaktuar dy viktima në harkun e dy ditëve në rrugët e vendit. Viktimë këtë të hënë mbeti një 29-vjeçar nga Lushnja, pasi motori u përplas me një makinë. Shpejtësia dhe përdorimi i alkoolit janë të tjera arsye, ndaj policia rrugore ka shtuar kontrollet në rrugë.
Një 29-vjeçar humbi jetën në një aksident automobilistik në Divjakë.
Klinton Xharaj, po udhëtonte me motor kur në fshatin Këmishtaj, u përplas me një makinë.
Goditja siç tregojnë pamjet ka qenë e fortë dhe për pasojë i riu humbi jetën menjëherë në vendin e ngjarjes.
Sipas raportimeve, motori i drejtuar nga 29-vjeçari, i cili u përplas ballë për ballë me makinën dhe përfundoi pas mjetit.
Dyshimet janë se shkak për aksidentin u bë humbja e kontrollit nga i riu, por ekspertët e policisë rrugore ende nuk kanë dalë në përfundime.
29-vjeçari është viktima e dytë e aksidenteve me motor në rrugët e Lushnjes në harkin e dy ditëve, ku një prej faktorëve ka qenë mos mbajtja e kaskës mbrojtëse në kokë.
Më herët një aksident me pasojë një të plagosur u shënua në Durrës!
Një autoambulancë e Fierit u përplas me trafikndarësën mbi urën e Dajlanit dhe pëfundoi e mënjanuar në mes të rrugës.
Fatmirësisht në momentin e aksidentit ambulanca nuk po tranportonte të sëmurë, ndërsa drejtuesi i saj mbeti i plagosur lehtë.
Të paktën 8 persona kanë humbur jetën në rrugët e vendit në dy javët e para të vitit, ndërsa dhjetra të tjera kanë mbetur të plagosur.
Shpejtësia, shkelja e rregullave të qarkullimit dhe përdorimi i alkoolit në drejtimin e mjetit janë ndër shkaqet kryesore që përgjakin rrugët e vendit.
Ndaj policia rrugore në të gjithë vendin ka forcuar kontrollet në rrugë duke ndëshkuar mijëra shkelës vetëm javën që lamë pas.
