Koreja e Veriut lëshon një raketë të paidentifikuar

Nga OraNews Përditësimi i fundit 5 Janar 2022, 07:29

Koreja e Veriut ka lëshuar një raketë të  paidentifikuar në det, njofton Shefi i Shtabit të Përbashkët të Koresë së Jugut (JCS).

Roja bregdetare japoneze, e cila raportoi fillimisht lëshimin, tha se mund të ishte një raketë balistike, por ende nuk është dhënë asnjë konfirmim.

OKB-ja ka ndaluar Korenë e Veriut nga testet e armëve balistike dhe bërthamore.

“Inteligjenca e Koresë së Jugut dhe ajo amerikane po analizojnë nga afër për detaje të mëtejshme”, tha JCS në një deklaratë.

Ministri japonez i mbrojtjes, Nobuo Kishi,  tha se raketa e dyshuar balistike kishte fluturuar rreth 500 km, sipas një raporti të Reuters, por sipas një eksperti, ky informacion nuk mund të konfirmohet ende.

Testimi i armëve vjen pasi Koreja e Veriut nuk i përgjigjet propozimit të SHBA për të filluar kontaktet diplomatike midis dy vendeve në mënyrë që të rifillojnë negociatat.

Gjatë një takimi historik të Partisë së Punëtorëve të Koresë në pushtet javën e kaluar, udhëheqësi i Koresë së Veriut Kim Jong Un ripohoi gatishmërinë e tij për të rritur shërbimet ushtarake të vendit të tij, të cilat janë sanksionuar ashpër nga komuniteti ndërkombëtar.

Bisedimet Phenian-Uashington janë në bllokim pas dështimit në vitin 2019 të  takimit midis Kim Jong Un dhe presidentit të atëhershëm të SHBA-së, Donald Trump në Hanoi.

Që kur Joe Biden mori detyrën pothuajse një vit më parë, Shtetet e Bashkuara kanë deklaruar vazhdimisht se janë të gatshme të fillojnë komunikime me Korenë e Veriut. Megjithatë, Pheniani e ka refuzuar deri më tani ofertën.