"U rrah aq shumë sa iu thye nofulla", kryetari i bashkisë dhe këshilltari zgjidhin në ring mosmarrëveshjet

Nga OraNews Përditësimi i fundit 14 Dhjetor 2021, 22:09

Dy politikanë në Brazil kanë vendosur t'i zgjidhin ndryshe mosmarrëveshjet e tyre dhe jo nëpërmjet debatit.

Kryetari i Bashkisë së Borbës, Simão Peixoto dhe ish-këshilltari Erineu Alves Da Silva vendosën që t'i "lanin hesapet" brenda ringut.

Silva, i cili përdor pseudonimin Mirico, akuzoi kryebashkiakun se nuk kishte qenë në gjendje për të ruajtur një park ujor pranë lumit Madeira dhe kërkoi një përballje me të duke e quajtur politikan të "kalbur" dhe "mashtrues".

Peixoto e pranoi sfidën, duke publikuar një video në internet në të cilën ai tregoi gatishmërinë për të goditur Silvën.

"Tregoje fytyren tende!" i tha kryebashkiaku Mirikos.

Më datë 12 dhjetor, në një shkollë lokale u zhvillua ndeshja e shumëpritur mes tyre. Peixoto u fut në ring rreth orës 2:30 të mëngjesit, i rrethuar nga ndihmësit e ti dhe mbante një peshqir të zi të stampuar me emrin "Jezus".

Dëshmitarët e përleshjes 13-minutëshe – të cilën skuadra e Peixoto-s e transmetoi drejtpërdrejt – thanë se kryebashkiaku konservator i Borbës mori disa goditje të dhimbshme. Në sekondat e hapjes, 39-vjeçari e rrëzoi Miricon për një kohë të shkurtër në tokë.

Por Mirico, 45 vjeç, u kundërpërgjigj. Pas tre raundesh, kryebashkiaku i Borbës pothuajse nuk ishte në gjendje të ecte për shkak të numrit të goditjeve që merrte nga kundërshtari i tij", raportoi BNC Amazonas.

"Kryebashkiaku u rrah aq shumë sa iu thye nofulla," raportoi një tjetër faqe interneti rajonale, Fato Amazônico .

Megjithatë, Peixoto mbizotëroi dhe arriti ta fitonte sfidën.