Kampion bote në shkëputje, shikoni si festoi Briken Calja. E uron dhe Rama: Respekt dhe përulje
Nga OraNews Përditësimi i fundit 10 Dhjetor 2021, 18:21
Kryeministri Edi Rama ka uruar peshëngritësin Briken Caljan për shpalljen kampion bote në stilin e shkeputjes.
Në faqen e tij në facebook, Rama ka ndarë një video nga ky moment triumfues i tij.
"KAMPION BOTE. Briken Calja, talenti me vullnet të hekurt, meriton sot një përulje me respekt, sepse ia doli të ngjitet në majën e botës pa e humbur kurajon e as durimin, në të përpjetën e vështirë dhe të rrëshqitshme drejt majës" shkruan Rama.
Peshëngritësi kuqezi mori më të mirën në njërin stil, atë të shkëputjes teksa në total ngriti 156 kg duke mposhtur rivalin tajlandez. Calja ngriti me sukses në provën e parë 152 kilogramë në shkëputje si dhe të dytën 154 kilogramë. Në proven e tretë ai arriti të ngrinte peshën 156 kilogram duke u shpallur kampion bote në shkëputje.
Ndryshe nga shkëputja, në stilin e shtytjes, Çalja arriti dy prova të ngrinte me 182 dhe 186 kg por dështoi në të fundit që mund t’i jepte edhe medaljen e artë e cila në këtë stil shkoi për rivalin nga Irani, Erwin. Ky i fundit triumoi edhe në dygarësh duke e lënë Briken Caljen nënkampion bote në dygarësh, pra një tjetër medalje, kesaj radhe e argjendtë.
Pra ne total, Çalja i dërgon nga Uzbekistani ku po zhvillohet Kupa e Botes, 1 medalje të artë dhe dy të argjendtë.
Ndërkohë Erkand Qerimaj mbeti jashtë zones së medaljes pasi ngriti vetëm 333 kg në dygarësh./Ora News/.
