Biznesmeni i vrarë në Malin me Gropa, nxirret trupi i pajetë i Ruzhdi Hoxhës nga gremina (VIDEO)
Nga OraNews Përditësimi i fundit 6 Nëntor 2021, 17:17
Policia ka bërë të mundur nxjerrjen e trupit të pajetë të biznesmenit Ruzhdi Hoxha në orët e vona të pasdites së sotme.
Ai u zbulua nga qentë gjurmues në një greminë të Qafë Mollës, pas malit të Dajtit i mbuluar me zhavorr e gurë.
Viktima rezulton të jetë qëlluar me një plumb në kokë. Pas nxjerrjes nga gremina, trupi i pajetë u nis drejt morgut për ekspertizë ligjore për të përcaktuar shkakun.
Policia ka ushtruar kontroll të gjithë zonës pasi ka dyshime se autori i krimit merrej me kultivim kanabisi.
Ai është arrestuar me 26 tetor si person i shpallur në kërkim ndërkombëtar nga autoritetet italiane për trafik droge.
Fillimisht efektivët e policisë arritën të gjejnë një ditë më parë në zonën e Dajtit xhupin e viktimës më pas ndërmorën operacionin e kërkimit masiv, ku u përfshinë edhe Forcat e Ndërhyrjes së Shpejtë.
Ruzhdi Hoxha rezulton të jetë larguar nga shtëpia rreth orës 23:00 të 20 tetorit.
I biri Saimir Hoxha denoncoi në polici se prej asaj kohe nuk kanë pasur më kontakt me të.
Më 24 tetor djali bën kallëzimin në Komisariatin e Policisë Nr.5, dhe një ditë më vonë njoftimi i zhdukjes u publikua në ëeb-in e Policisë së Shtetit.
Prej këtij afati deri dje askush në publik nuk dinte për ngjarjen dhe vetëm më 5 Nëntor, lajmi i rrëmbimit të biznesmenit Ruzhdi Hoxha doli në media.
Të shtunën, më 6 nëntor u zbulua i pajetë.
