Po ndërtonin pa leje 3 objekte në Palasë, 11 në pranga, në kërkim investitori
Nga Edi Ruçi Përditësimi i fundit 29 Tetor 2021, 10:14
Fotoja e shpërndarë nga Policia e Vlorës tregon tri objekte pa leje që po ndërtohen në fshatin Palasë në Dhërmi
Blutë kishin marrë informacion se punimet në kompleksin e investuar nga shtetasi Vezir Gjikolaj po zhvilloheshin në shkelje të ligjit, çka është vërtetuar nga kontrolli i ushtruar aty.
32 vjeçari nga Himara është shpallur në kërkim për akuzen e ndërtimit të paligjshëm.
11 persona që u gjetën duke punuar në ndërtimet pa leje u vunë në pranga në kushtet e flagrancës. Ata akuzohen për “Dhënie ndihmë për ndërtim të paligjshëm”
'Nga hetimet e kryera dyshohet se këta shtetas, të punësuar nga shtetasi Vezir Gjikolaj, po kryenin punime për ndërtimin e tri objekteve, në fshatin Palasë, Himarë" informoi policia.
Zbulimi i kompleksit pa leje në një prej zonave turistike të shumë lakmuara në bregdet ka evidentuar edhe dështimin e institucioneve që kanë për detyrë monitorimin e territorit.
Ndaj policia ka vënë nën hetim për akuzën e shpërdorimit të detyrës dy specialistët e IMT-së, Renato Hodaj dhe Erjon Zenelaj.
Prej muajit qershor e në vijim, policia e Shtetit dhe IKMT vijojnë operacionin “Bregdeti Ynë” për shembjen e ndëtimeve pa leje në vijën bregdetare nga Velipoja në Ksamil.
Pak ditë më parë, Ministri i Bredshëm lajmëroi se subjekt i operacionit do të jenë edhe ndërtimet e përjashtuara nga procesi i Legalizimit.
IKMT do të shembë edhe ndërtimet e cilësuara pa leje edhe në zonat e mbrojtura, dhe përgjatë rrugëve kombëtare
