Të gjelbrit votojnë për koalicionin, ambientalistët, socialdemokratët dhe liberalët janë shprehur pro bashkëpunimit
Nga OraNews Përditësimi i fundit 17 Tetor 2021, 12:03
Në Gjermani të dielën do të mësohet e ardhmja e një koalicioni të ri qeverisës ku të Gjelbrit janë faktor kyç. Ambientalistët vendosin a duhet të bashkëpunojnë për katër vitet e ardhshme me socialdemokratët dhe me liberalët, përkundër CDU-CSU-së.
Partia e Gjelbër e Gjermanisë i ka kërkuar delegatëve të saj të vendosin formalisht që të formojnë një koalicion qeverisës me Partinë Socialdemokrate dhe me Demokratët e Lirë.
Mbledhja mbahet tri javë pasi zgjedhjet e 26 shtatorit nxorën humbëse bllokun politik të kancelares Angela Merkel.
Ambientalistët, SPD-ja dhe FDP-ja kanë thënë se e mbështetin bashkëpunimin katërvjeçar dhe konventa e së dielës pritet të konfirmojë nisjen e bisedimeve.
Edhe populli gjerman në sondazhet e fundit e përkrah socialdemokratin Olaf Sholc si kancelari i ri i Gjermanisë.
Ndërkohë Armin Lashet, kreu i CDU-së dhe pasuesi politik i Merkelit, pranoi të shtunën përgjegjësinë për rezultatin e dobët në zgjedhje.
Ai tha se nuk do e qeverisë më landin e madh të Nordrain-Vestfalisë.
"Urgjentisht duhet të gjejmë unitetin. Gjërat nuk mund të qëndrojnë si tani, por të bëhemi bashkë kundër pjesës tjetër të spektrit politik, jo kundër njëri-tjetrit në familjen tonë konservatore."- tha ai.
Kristian demokratët e mposhtur politikisht kanë planifikuar ta ndërrojë lidershipin e partisë në muajin dhjetor.
Ndërkohë në marrëveshjen paraprake, socialdemokratët, ambientalistët dhe liberalët janë shprehur se për rritjen e investime, uljen e burokracisë, për mos rritjen e taksave dhe për një Gjermani më të gjelbër e dixhitale.
