Betejë PD-PS për “Bechettin” Basha: Refuzimi i komisionit, për interesa të Ramës e Veliajt, nuk tërhiqemi

Nga OraNews Përditësimi i fundit 11 Tetor 2021, 14:20

Komisioni hetimor për çështjen Becchetti duket se do të kthehet në betejë politike mes mazhorancës dhe opozitës. Pas vendimit të PS për të refuzuar hetimin parlamentar për këtë çështje, kryetari u PD Lulzim Basha tha se opozita nuk tërhiqet. Ai shtoi se refuzimi nuk ka të bëjë me Shqipërinë por frikën e Edi Ramës dhe Erion Veliajt që janë përgjegjës për humbjen e mbi 100 milionë eurove nga xhepat e qytetarëve.

Refuzimi i mazhorancës për ngritjen e komisionit hetimor për çështjen Becchetti, sipas kryetarit të PD Lulzim Basha nuk ka lidhje me betejën e Shqipërisë në gjykatat ndërkombëtare por me refuzimin për transparencë në lidhje me këtë çështje.

Basha: Të fshihet dhe të fshehësh dosjen më të madhe korruptive të këtyre 30 viteve, lidhur me Becchettin, është në interesin e Ramës, Veliajt dhe Agaçit. Ta harrojnë se do t’i lejojmë dhe do t’i pranojmë mos aprovimin e këtij komisioni që nuk e dëmton Shqipërinë, por që dëmet të mos bien xhepat e qytetarëve.

Pas mbledhjes së grupit parlamentar të partisë demokratike, Basha hodhi akuza ndaj mazhorancës edhe për krizën energjitike, duke theksuar se ajo më së shumti është shkaktuar nga keqpërdorimet e kësaj qeverie.

Basha: Të enjten do të mbahet seanca plenare e radhës, jo vetëm rendi i ditës, por edhe gjendja që ka pllakosur në vend janë tregues se kemi të bëjmë me një krizë korrupsioni. Një krizë e cila ka nisur me vendimin që në verë të zbrazej kaskada e Drinit dhe të shitej me 1/3 të çmimit që do të blihet tani energjia. E kanë shitur 70 milionë euro dhe do të blejnë mbi 200 milionë euro me borxh nga xhepat e shqiptarëve. Kjo nuk është krizë energjitike, por korrupsioni.

Kryedemokrati është shprehur i vendosur në lidhje me nismat për komisionet hetimore për zgjedhjet e 25 prillit dhe inceneratorët duke thënë se nuk do të lejojë shkeljen e këtyre të drejtave kushtetuese të opozitës nga qeveria.

Basha: Kjo javë do të nisë me një ofensivë që do të ketë në fokus interesin e shqiptarëve. Kjo krizë korrupsioni po maskohet si krizë energjitike. Unë ju ftoj që t’i drejtoni kamerat e mikrofonat te qytetarët e dyqanet. Njerëzit po blejnë me listë si asnjëherë më parë. Pas tellallit të së keqes që doli për krizën, çmimet kanë kapërcyer.